«Գեւորգը հեռացվեց, որովհետեւ օրինական պահանջ ուներ, իսկ այս դատարանում օրինական պահանջ ներկայացնելը հղի է անցանկալի հետեւանքներով»,- Գեւորգ Սաֆարյանին դատարանից հեռացնելու որոշման մասին այս կարծիքին է փաստաբան Արայիկ Պապիկյանը, որը Ժիրայր Սեֆիլյանի եւ մյուսների գործով ամբաստանյալ Ներսես Պողոսյանի պաշտպանն է:
«Մենք չենք կարող ակնկալել արդարադատություն, դեռ նախորդ դատական նիստերից պաշտպանական կողմը ցանկանում էր հայտարարություն անել, դատարանը թույլ չէր տալիս, իսկ մեղադրող կողմին հնարավորություն տվեց, Գեւորգը ընդամենը հարցրեց՝ արդյոք իրավահավասարության սկզբունքը մեզ վրա չի՞ տարածվում:
Նրա նկատմամբ դատական սանկցիա կիրառվեց, բայց դա ուղղված էր բոլորիս, որ այլեւս օրենք ու իրավունքներ չպահանջենք»,- ասաց պարոն Պապիկյանը:
Անդրադառնալով իր միջնորդության վերաբերյալ դատարանի որոշմանը՝ պարոն Պապիկյանն ասաց՝ նախագահող դատավորը նույնիսկ այն չէր էլ ընթերցել. «Դա վկայում է, որ 0,37 րոպեն, որ ամեն էջի վրա ծախսում էր, այս անգամ էլ չօգտագործեց: Դատավորը չէր տեսել, որ այդ միջնորդության տակ ստորագրել էին փաստաբաններ Պապիկյանն ու Կարապետյանցը, ինքը մերժեց Պապիկյանի միջնորդությունը»:
Արփինե ՍԻՄՈՆՅԱՆ
