Այսօր Ազգային ժողովում տեղի ունեցավ ԱԺ պատգամավոր Շիրակ Թորոսյանի հեղինակած «Ծովային ելքի հիմնահարցը Հայաստանի Հանրապետության արտաքին քաղաքականությունում 1919-1920թթ» գիտական մենագրության շնորհանդեսը:
«Ծովը շատ կարևոր ատրիբուտ է պետության համար։ Իսկ Հայաստանը, որ պատմականորեն ունեցել է ծով, ընդամենը ձգտում էր առաջին Հանարապետության սահմաններում ևս ծովային փոքրիկ ելք ունենալ։ Գրեթե բոլոր երկրները ընդդիմացան դրան։ Եթե կային մեծ տերություններ, որոնք ստորագրել էին Հայաստանին Տրապիզոնով կամ Բաթումով ծովային ելք տրամադրելու համաձայնագիրը, վերջում իրենք իսկ մերժեցին սեփական ստորագրությունները»,- իր խոսքում ասաց Շիրակ Թորոսյանը։
Պատգամավորը հավաստիացրեց`իր գիտական ուսումնասիրությունների կիզակետում մշտապես է եղել Հայաստանի առաջին հանրապետության շրջանը: «Սա այն պարզ պատճառով, որ առաջին Հանրապետության ժամակաշրջանը հայ ժողովրդի պատմության համար կարևորագույն ժամանակաշրջան էր։ Առաջին Հանրապետության հիմնադրմամբ հիմք դրվեց Խորհրդային Հայաստանին և մերօրյա 3-րդ Հանրապետությունը։ Առաջին և երրորդ Հանրապետությունների միջազգային դրության և արտաքին քաղաքականության նմանությունները շատ-շատ են։ Ուսումնասիրելով Հայաստանի առաջին Հանրապետության արտաքին քաղաքականությունը, վեր հանելով ձեռքբերումները՝ լուրջ պատգամներ ենք վերցնում այսօր ճիշտ արտաքին քաղաքականություն վարելու համար»,- իր խոսքում ասաց Շիրակ Թորոսյանը։
Գրքի շնորհանդեսին ներկա ԳԱԱ պատմության ինստիտուտի տնօրեն Աշոտ Մելքոնյանը և ԵՊՀ պատմության ֆակուլտետի դեկան Էդիկ Մինասյանն իրենց հերթին բարձր գնահատեցին մենագրությունը՝ նշելով, որ այն գործնական նշանակություն ունեցող աշխատություն է։
Մանրամասները`շուտով տեսանյութում:
Նելլի ԳՐԻԳՈՐՅԱՆ
