2016թ. ՀՀ ոստիկանության ՊՊԾ գունդը գրաված «Սասնա ծռեր» խմբի անդամների՝ դատավոր Մեսրոպ Մակյանի վարույթում գտնվող գործով հերթական դատական նիստում այսօր շարունակվում է գործում առկա փաստաթղթերի հրապարակումը: Մեղադրող-դատախազներ Պետրոս Պետրոսյանն ու Արամ Արամյանը հրապարակում են ՊՊԾ գնդի տարածքում գնդի գրավումից հետո տարբեր շինություններից հայտնաբերված ռազմամթերքի փորձագիտական եզրակացությունները: Ըստ փորձագետներ Համբարձումյանի եւ Ավետիսյանի՝ գնդի տարածքում հայտնաբերված տասնյակ ատրճանակները, փամփուշտները, ինքնաձիգերը հանդիսանում են ռազմամթերք եւ պիտանի են նպատակային օգտագործման՝ կրակելու համար:
Դրանց մի մասն օգտագործված է եղել. թե երբ են նշյալ զենքերով կրակոցներ արձակվել, վաղեմությունը հնարավոր չի եղել ճշտել՝ համապատասխան գիտական մեթոդիկայի բացակայության պատճառով: Հատկանշական է, որ ըստ փորձագիտական եզրակացության՝ հայտնաբերված լուսաձայնային նռնակները ռազմամթերք չեն հանդիսանում, սակայն պիտանի են օգտագործման համար: Դատապայթյունատեխնիկական փորձաքննության համաձայն էլ՝ ՊՊԾ գնդի բուժկետում հայտնաբերվել է նռնակ իր պայթուցիչով, որը հանդիսանում է օգտագործման համար պիտանի ռազմամթերք:
Նշյալ փորձագիտական եզրակացությունների իրականացման համար ծախսվել է հիմնականում 67, 50, 33, 35, 62 հազարական դրամ:
Լուիզա ՍՈՒՔԻԱՍՅԱՆ
Լուսանկարում՝ ամբաստանյալներից Սեդրակ Նազարյանը
