Առաջին անգամ Հայաստանում եկել իշխանություն, որը չի խոսում տարածք զիջելու մասին:
Այս մասին Аravot.am-ի հետ զրույցում ասաց Արցախի խորհրդարանի պատգամավոր Հայկ Խանումյանը:
«Սա կարևորագույն ձեռքբերում է, որովհետև Հայաստանի նախկին իշխանությունները, և Սերժ Սարգսյանը հատկապես, պատեհ անպատեհ առիթներով հնչեցրել են տարածքներ զիջելու մասին հայտարարություններ, ինչը ոչ միայն թուլացնում էր մեր դիրքերը բանակցություններում, այլ նաև թիկունքից հարված էր Արցախում ապրող մարդկանց համար»,- ասաց Հ. Խանումյանը:
Նրա խոսքով հատկապես Արցախի որոշ շրջաններում ապրող բնակիչներ, այդ հայտարարություններով պայմանավորված, իրենց անվտանգության հետ կապված խնդիրներ էին տեսնում և հրաժարվում երկարաժամկետ ներդրումներից:
Անդրադառնալով Հայաստանի և Ադրբեջանի միջև օպերատիվ կապի հաստատմանը՝ Հ. Խանումյանը ասաց, որ 1990- կանների սկզբին Ստեփանակերտ-Բաքու անմիջական կապի շնորհիվ շատ հարցեր են լուծվել՝ այդ թվում հումանիտար և նման կապի աստիճանաբար հաստատումը կարևոր է առաջացած հարցերն անմիջականորեն լուծելու համար:
Հայկ Խանումյանը նաև նշեց, որ Հայաստանում խորհրդարանական արտահերթ ընտրություններից հետո հակամարտության լուծման ուղղությամբ մեծ զարգացումներ չի ակնկալում:
«Սակայն ես մեծ հույս ունեմ, որ պաշտպանության ոլորտին հատկացվող բյուջեում կլինի աճ, ինչն առաջնագծում կբարելավի վիճակը, ինչպես նաև կմեծացնի պաշտպանությանն ուղղվող սպառազինությունը»,- նշեց Հ. Խանումյանը:
Դավիթ ԱԲԱՂՅԱՆ
