«Շատ լավ է, որ կա օպերատիվ կապ Հայաստանի եւ Ադրբեջանի զինված ուժերի մակարդակով, դա նախագահի ու վարչապետի միջեւ կապ չի, ինչպես դա բացատրեց պաշտպանության նախարար Դավիթ Տոնոյանը»,-ՀՀԿ ԳՄ նիստից հետո հրավիրված մամուլի ասուլիսին հայտարարեց ՀՀԿ անդամ Վիգեն Սարգսյանը:
Նա նշեց, որ նման կապ եղել է նաև նախկինում և հավելեց. «Լարված շրջանում նման կապ ունենալը կարող է օգտակար լինել չնախատեսված կամ պատահական զարգացումների լարումից»:
Վիգեն Սարգսյանը չցանկացավ գնահատականներ հնչեցնել ներկայումս պաշտպանության բնագավառում վարվող քաղաքականության վերաբերյալ, քանի որ ըստ նրա՝ դա ՊՆ նախկին նախարարի համար այդքան էլ ճիշտ չէ:
Դառնալով ՀԱՊԿ գլխավոր քարտուղարի ընտրության հարցին՝ Վիգեն Սարգսյանը զգուշացրեց՝ այդ պաշտոնը կորցնելու ռիսկ կա. «Մեր իշխանությունն ամեն ինչ պետք է անի թույլ չտալու համար ՀԱՊԿ գլխավոր քարտուղարի պաշտոնի կորուստը։ Եթե դեկտեմբերի 6-ին զիջենք այդ պաշտոնը, դա կլինի ձախողում: ՀԱՊԿ գլխավոր քարտուղար և ԵԱՏՄ-ում պաշտոն ունենալու համար մեր կառավարությունը բավականին լուրջ ջանքեր է ներդրել»:
Տաթև ՀԱՐՈՒԹՅՈՒՆՅԱՆ
