Հունիսի 5-ի գիշերը տեղացած կարկուտը վնասել է Արագածոտնի մարզի Ծաղկահովիտ խոշորացված համայնքի Ծիլքար և Լեռնապար բնակավայրերի աշնանացան ցորենի, գարնանացան կորնգանի և գարու արտերը:
Պատճառված վնասներին տեղում ծանոթանալու նպատակով ՀՀ Արագածոտնի մարզպետ Դավիթ Գևորգյանը, Ծաղկահովիտի համայնքապետ Նորաին Հակոբյանի և համայնքի բնակիչների ուղեկցությամբ, այսօր այցելել է կարկուտից տուժած դաշտեր:
Նախնական տվյալներով կարկուտ է տեղացել շուրջ 300 հա ցանքատարածությունների վրա՝ տեղ-տեղ պատճառելով 20֊80% վնասվածություն:
Վնասի չափը ճշգրիտ հնարավոր կլինի որոշել 2-3 օր անց միայն:
Կարդացեք նաև
Մարզի ղեկավարը հանձնարարել է ստեղծել հանձնաժողով, այցելել դաշտեր, անհատական և մանրամասն մասնագիտական ուսումնասիրություն իրականացնել վնասի իրական չափերը արձանագրելու համար:
Մարզպետարանի գյուղատնտեսության ոլորտի պատասխանատուների կողմից այսօր կատարվել է կարկտահարված տարածքների տվյալների հաշվառում:
Բնակիչների հետ զրույցի ընթացքում մարզպետն ընդգծել է, որ հարցն իր անմիջական վերահսկողության ներքո է գտնվում: Յուրաքանչյուր ցանքատարածության համար ցուցաբերվելու է անհատական մոտեցում, կատարվելու է պատշաճ ուսումնասիրություն, որի արձանագրություններն ստանալուն պես փոխհատուցման հարցը անձամբ կներկայացնի ՀՀ կառավարություն:
Բնակիչների հետ մարզպետը քննարկել է նաև գյուղատնտեսությանն առնչվող այլ հարցեր, ճանապարհի վերանորոգման, համայնքի զարգացման և համայնքային նշանակության հարցերի լայն շրջանակ։
Արագածոտնի մարզպետարան
