Երեկ երեկոյան ժամը 22․00-ին, աշխատանքային պարտականություններն իրականացնելիս՝ Գյումրու քաղաքապետարանի կոմունալ ծառայության աղբատարի վարորդ, 44-ամյա Արմեն Խանոյանը անզգուշությամբ վերցրել է աղբի մեջ գտնվող իրը՝ չմտածելով, որ այն կարող է պայթուցիկ լինել։ Վարորդը կորցրել է ձեռքի երկու մատները։ Դեպքը տեղի է ունեցել Կոշտոյան փողոցում։
Գյումրու համայնքային բյուջետային հիմնարկի կոմունալ ծառայության տնօրենի ժ/պ Վարդգես Սամսոնյանն Aravot.am-ին ասաց․ «Արմեն Խանոյանը մեզ մոտ աշխատում է 2016 թվականից, շատ լավ աշխատող է, պարտաճանաչ, կարելի է անզգուշություն դիտարկել մեր վարորդի կողմից․ աղբի միջից հանել է իրը՝ չգիտակցելով, որ գլխի հատվածում պայթուցիկ է, ձեռքի մեջ տրաքել է»։
Հարցին՝ մի՞թե աղբատարի վարորդներն այդքան ուշ ժամի են աշխատում, Վարդգես Սամսոնյանն ասաց․ «4-5 օր է՝ որոշակի ընտանեկան հարցեր ուներ՝ խնդրում էր երեկոյան ժամը 20․00-ից դուրս գալ աշխատանքի։ Թե հիմա ո՞վ է պայթուցիկը գցել աղբամանի մեջ, նախաքննական պրոցեսի մեջ է, իրավապահ մարմինները կփորձեն բացահայտել»։
Գյումրի բժշկական կենտրոնի փոխտնօրեն Արմեն Խաչատրյանն էլ Aravot.am-ին փոխանցեց, որ վարորդը ստացել է աջ դաստակի պայթյունային վնասվածք, 4-րդ, 5-րդ մատների անդամահատում, իրանի կետային վնասումներ։
Կարդացեք նաև
Նունե ԱՐԵՎՇԱՏՅԱՆ
