«Որեւէ բանով կաշկանդված չեմ: Եթե, օրինակ, առաջիկայում ի հայտ կգա նոր փաստ կամ հանգամանք, կդիտարկենք այն եւ կհասկանանք՝ դիտարկումը մեզ նոր եզրակացության հանգեցնո՞ւմ է, թե ոչ: Այժմ ինչ ասում եմ, ասում եմ եզրակացության հիման վրա»,-«ֆեյսբուքյան» ուղիղ միացմամբ քիչ առաջ անդրադառնալով Ամուլսարի շահագործման խնդրին, հայտարարեց ՀՀ վարչապետ Նիկոլ Փաշինյանը: Նա նշեց՝ կարեւոր է այն հանգամանքը, որ Ամուլսարի հանքի ազդակիր համայնքի ներկայացուցիչները փաստարկներ են բերում. «Բայց հաշվի առեք, որ դրանք բոլորը հնչել են նաեւ մեկ տարի առաջ: Այդ փաստարկները ես լսել եմ, մտածել, նախաձեռնել եմ քրեական գործի հարուցում, որ դրանց պատասխանները տրվեն: Չեն կարող ինձ մեղադրել նրանում, որ ես այդ փաստարկները չեմ լսել: Չեմ քնել, կարդացել եմ: Բոլորը երդվում են, որ իրենց փաստարկը ճիշտ է, բայց երդման վրա հո չե՞մ հիմնվելու: Հարգելի բնապահպանների բոլոր տեքստերը ես լսել եմ մեկ տարի առաջ»:
Ինչ վերաբերում է մեկնաբանություններին, թե ՀՀ կառավարությանն ինչ-ինչ միջազգային ուժեր ճնշում են, որպեսզի Ամուլսարը շահագործվի, Փաշինյանը վստահեցրեց. «Նման բան չի կարող լինել լեգիտիմ կառավարության հետ: Այս ընթացքում կառավարությունը կասեցրել է բոլոր փորձերը, որոնք պարունակել են նման ենթատեքստ»:
Լուիզա ՍՈՒՔԻԱՍՅԱՆ
Կարդացեք նաև
