Եղիշե Չարենցի անվան Գյումրու թիվ 25 դպրոցի աշակերտների ծնողներն այսօրվանից՝ ի նշան բողոքի, հրաժարվել են երեխաներին դպրոց տանել։ Նրանք այս մասին երեկ նախազգուշացրեցին նաև Շիրակի նորանշանակ մարզպետ Հովհաննես Հարությունյանի հետ հանդիպման ժամանակ։
Մեզ հետ զրույցում ծնողներից մեկն ասաց, որ երեխաներին դպրոց չեն տանի այնքան ժամանակ, մինչև լսելի կդառնա իրենց բողոքը, փոխվարչապետ Տիգրան Ավինյանը կվերանայի Իրինա Բաղդասարյանին տնօրեն նշանակելու իր որոշումը։ Նա նաև նշեց, որ սկսվել է ստորագրահավաք։
Հիշեցնենք, որ թե՛ դպրոցի անձնակազմի, թե՛ ծնողների բողոքը կապված է տնօրենի պաշտոնում այս դպրոցի հետ առնչություն չունեցող Իրինա Բաղդասարյանին նշանակելու հետ։ Նրանք պահանջում են տնօրեն նշանակել նույն դպրոցի պատմության երկարամյա ուսուցիչ Մերուժան Մինասյանին, որը մրցույթում երկու ձայն ավելի է հավաքել Իրինա Բաղդասարյանից։
Գյումրու լավագույններից մեկը համարվող այս դպրոցի տնօրենի թափուր պաշտոնի համար հայտարարված մրցույթում հաղթող են ճանաչվել այս երկուսը՝ նույն դպրոցի պատմության ուսուցիչ Մերուժան Մինասյանը և Գյումրու դպրոցներից մեկի փոխտնօրեն Իրինա Բաղդասարյանը։ Ու քանի որ նրանցից ոչ մեկը չէր հավաքել հինգ ձայն, ուստիև, ըստ գործող կարգի, նշանակումը կատարել է փոխվարչապետը։ Տիգրան Ավինյանն էլ նախապատվությունը տվել է Իրինա Բաղդասարյանին, ինչն էլ հարուցել է դպրոցի անձնակազմի ու ծնողների զայրույթը։
Կարդացեք նաև
Նրանք երեկ Շիրակի մարզպետի հետ հանդիպման ժամանակ էլ նշեցին, որ եղել է հովանավորչություն․ Իրինա Բաղդասարյանը Շիրակի մարզպետարանի իրավաբանական բաժնի պետ Գեղամ Բաղդասարյանի քույրն է, և նրա համար միջնորդել է այն անձը, որը ութնամյա կրթությամբ մի տղայի խոպանից բերեց ու կարգեց յոթ միավորված համայնքի ղեկավար։ Ծնողները նշում էին, որ հեղափոխություն չեն արել՝ նման «թայֆաբազությունները» շարունակելու համար։
Նունե ԱՐԵՎՇԱՏՅԱՆ