«Ինչպե՞ս է ի վերջո հանգուցալուծվելու ներքաղաքական ճգնաժամը։ Ե՞րբ եք պատկերացնում արտահերթ խորհրդարանական ընտրություններ, քաղաքական ուժերի հետ խորհրդակցություններ սկսե՞լ եք, սահմանադրական փոփոխությունները ե՞րբ եք պատկերացնում»,-ԱԺ-կառավարություն հարցուպատասխանի ժամանակ այսօր վարչապետ Նիկոլ Փաշինյանին հարցրեց անկախ պատգամավոր Արման Բաբաջանյանը։
Նիկոլ Փաշինյանը պատասխանեց․ «Այո, առաջարկել եմ, շնորհակալ եմ նաեւ ձեր կուսակցությանը, որովհետեւ դեռ այն ժամանակ ընդունել եք առաջարկս։ Եթե խորհրդարանական ընդդիմության գործընկերներն ընդունեն առաջարկը, կունենանք արտահերթ խորհրդարանական ընտրություններ համաձայնեցված ժամկետներում։ Հարց է հնչում, թե ինչո՞ւ ընտրություններն անել համաձայնությամբ։ Որովհետեւ չենք ուզում անել քայլեր, որոնք կդիտարկվեն «ի հեճուկս»-ի տրամաբանությամբ։ Ընտրությունները գործիք են՝ ժողովրդին արտահայտվելու հնարավորություն տալու համար։ Արդեն հրավեր եմ հղել խորհրդարանական ընդդիմության ղեկավարներին։ Պլանավորում եմ առաջիկա օրերին հանդիպել։ Հուսամ՝ համաձայնությունը ձեռք կբերվի»։
Հիշեցնենք, որ մարտի մեկին հանրահավաքի ժամանակ Նիկոլ Փաշինյանը խոսել էր նաեւ սահմանադրական փոփոխությունների անհրաժեշտության մասին։ Հիշեցնենք նաեւ, որ այսօր Նիկոլ Փաշինյանը չարձագանքեց պատգամավորների հարցերին։ Սա նրա միակ ելույթն էր։ Նրա փոխարեն հարցերին պատասխանում էր փոխվարչապետ Տիգրան Ավինյանը։
Կարդացեք նաև
Լուիզա ՍՈՒՔԻԱՍՅԱՆ
