Aravot.am-ը տեղեկացրել էր, որ ըստ ոստիկանության, թիվ 163 դպրոցի տնօրենը կասկածվում է մարդկանց աշխատանքի ընդունելու մեջ, որոնք աշխատանքի չեն հաճախել, բայց աշխատավարձ են ստացել, եւ նրանց թվում է եղել նաեւ իր որդին:
Aravot.am-ի հետ զրույցում դպրոցի տնօրեն Նարինե Վարդերեսյանն (լուսանկարում) ասաց, որ երբ 5 տարի առաջ ընդունվել է աշխատանքի, կրթօջախը 21 միլիոն դրամ պարտք է ունեցել, որը 5 տարվա ընթացքում տնտեսումների ու մանկավարժների ամառային աշխատանքի արդյունքում ամբողջությամբ փակել է, անգամ փակման եզրին գտնվող դպրոցի աշակերտների թիվն է աճել:
«Դպրոցը 1983 թվականից առայսօր չի վերանորոգվել, տանիքն էլ կաթում էր, հոսանքի լարերը վտանգ էին ներկայացնում, հավաքարարներն ու պահակներն էլ թոշակառուներ էին, որոնք չէին կարող նորմալ աշխատել»,-հայտնեց տնօրենը:
Նա նշեց, որ իր` տնօրեն նշանակվելուն պես երկարօրյա պարապմունքներ եւ ճամբար է կազմակերպվել, աշակերտներին ապահովել է տրանսպորտով, որը հետո վճարովի է դարձել, բայց ամեն աշակերտ վճարել է ընդամենը 100 դրամ:
Տնօրենը չթաքցրեց, որ բանվորներ է ընդունել աշխատանքի, որոնք բարեխղճորեն կատարել են իրենց աշխատանքը: «Պահակները թոշակառու էին, մատները մատներին չէին խփում, դպրոցն էլ կեղտի ու փոշու մեջ էր, հատկապես զուգարաններն ահավոր վիճակում էին: Դպրոցի մասնաշենքերից մեկը տրամադրվել էր մի կենտրոնի, որը 6 միլիոնի շինարարություն է իրականացրել, վերանորոգվել են զուգարանները»,-շեշտեց նա:
Նարինե Վարդերեսյանն ասում է, որ որպեսզի դպրոցի ներսի աշխատանքները կատարվեին, եւ մանկավարժներին չասեր` այս ու այն տեղափոխեն, երիտասարդների է ընդունել, որոնց թվում եղել իր որդին եւ նրա ընկերները. «Երեքով մշտական աշխատել են, թող ոստիկանությունը թող գա, լրագրողները գան եւ ում ուզում են հարցնեն»:
Տիկին Վարդերեսյանը նշում է, որ իր աշխատանքային պայմանագիրը լրանում էր հունիսին, նաեւ ընտանեկան խնդիրների պատճառով պետք է բացակայեր երկրից, ստիպված գրել է ազատման դիմում, որպեսզի հետո նորից մասնակցի մրցույթին, հիմա իր դեմ արշավը կազմակերպվում է իրեն ճանապարհից հեռացնելու համար:
Նա պնդում է, որ իր դեմ ուղղված արշավի հետեւում դասվար Լուսինե Պուլուզյանն է, որը նաեւ արհմիության նախագահն է, արդեն հավաստագիր է ստացել ու իրավունք ունի մասնակցելու տնօրենի թափուր տեղի համար մրցույթին:
Aravot.am-ը կապվեց նաեւ տիկին Պուլուզյանի հետ: Նա ասաց, որ այս պահին ձեռնպահ կմնա մեկնաբանություններ անելուց, եւ երբ ժամանակը կգա, այն ժամանակ էլ կխոսի, իսկ այդ ժամանակը, նրա ձեւակերպմամբ, կգա իրավապահ մարմինների բացահայտումներից հետ: Լուսինե Պուլուզյանը նաեւ ասաց, որ վստահ չէ` արդյոք կմասնակցի՞ տնօրենի թափուր տեղի համար հայտարարված մրցույթին, թե ոչ:
Գոհար ՀԱԿՈԲՅԱՆ
Նարինե Վարդերեսյանի լուսանկարը` դպրոցի կայքից
