«Ռոբերտ Քոչարյանը եւ Սերժ Սարգսյանը մարտական ընկերներ են․ ոչ ես, ոչ դուք չենք կարող վերլուծել նրանց հարաբերությունները»,-Երեւանի կենտրոնում այսօր Նիկոլ Փաշինյանի հրաժարականի պահանջով բողոքի գործողությունների ժամանակ հայտարարեց ԱԺ «Պատիվ ունեմ» խմբակցության պատգամավոր Հայկ Մամիջանյանը՝ անդրադառնալով նկատառմանը, որ Ռոբերտ Քոչարյանն ու Սերժ Սարգսյանը բողոքի գործողությունների ժամանակ միմյանց չեն հանդիպել այս ընթացքում, ինչ-որ հակասությո՞ւն կա նրանց միջեւ։
«Իրենք անցած մեծ ճանապարհ ունեն, որի մասն անցել է մարտական գործողությունների միջով։ Կարծում եմ՝ դա մեր քննարկման խնդիրը չէ։ Նախագահ Սարգսյանն այցելում է վրանային ավան եւ շփվում ցուցարարների, քաղաքացիների հետ, տեղում տալիս է նաեւ կազմակերպչական հանձնարարականներ հենց այդտեղ ձեւավորված շտաբից։ Այլ համադրումներ կառուցել չեմ կարող»,-հավելեց Հայկ Մամիջանյանը։
Լուիզա ՍՈՒՔԻԱՍՅԱՆ
