Սեպտեմբերին ապատեղեկատվություն տարածելով՝ Բաքուն մեկ գլխավոր նպատակ ուներ. աշխարհին ցուցադրել, թե Հայաստանը ամեն օր խախտում է հրադադարը, իսկ երբ արդեն Ադրբեջանը կսկսեր հարձակումը, կհայտարարեր, որ սա երկար մտածված հայկական հարձակում է Ադրբեջանի դեմ:
Մարտի 6-ից սկսած գրեթե ամենօրյա ռեժիմով Ադրբեջանի պաշտպանության նախարարությունը ապատեղեկատվություն է տարածում, թե իբր Հայաստանի զինված ուժերի ստորաբաժանումները կրակ են բացել ադրբեջանական դիրքերի ուղղությամբ, իսկ մարտի 9-ին և 13-ին հենց ադրբեջանական ստորաբաժանումները կրակ բացեցին հայկական դիրքերի վրա: Հրադադարի խախտումների մասին կեղծ լուրեր Ադրբեջանը տարածում է նաև Արցախի մասով, իսկ պարբերական սադրանքներն ու մտածված հարձակումները նույնպես շարունակական են:
Այս պատկերը ակամայից հիշեցնում է 2022 թվականի սեպտեմբերի ադրբեջանական ագրեսիային նախորդած ժամանակաշրջանը: Սեպտեմբերի 2-ից՝ Բրյուսելում Նիկոլ Փաշինյանի, Շարլ Միշելի և Իլհամ Ալիևի եռակողմ հանդիպումից օրեր անց, Ադրբեջանի բանակը սկսեց ոչ միայն հայկական կողմին անհիմն մեղադրել ադրբեջանական տեղակայումների վրա կրակ բացելու մեջ, այլ սկսեց դիմել պարբերական սադրանքների, որի արդյունքում սեպտեմբերի 6-ին զոհվեց ժամկետային զինծառայող: 10 օր անց՝ սեպտեմբերի 13-ին սկսվեց Բաքվի լայնամասշտաբ հարձակումը Հայաստանի նկտմամբ: Հակառակորդն օկուպացրեց ՀՀ ինքնիշխան տարածքներ:
Կարդացեք նաև
Սեպտեմբերին ապատեղեկատվություն տարածելով Բաքուն մեկ գլխավոր նպատակ ուներ. աշխարհին ցուցադրել, թե Հայաստանը ամեն օր խախտում է հրադադարը, իսկ երբ արդեն Ադրբեջանը կսկսեր հարձակումը, կհայտարարեր, որ սա երկար մտածված հայկական հարձակում է Ադրբեջանի դեմ:
Արդյոք այս օրերին ապատեղեկատվություն տարածելով Ադրբեջանը նո/ւյն նպատակն է հետապնդում: Հստակ պատասխան չկա, բայց հայաստանյան մի շարք պաշտոնական աղբյուրներ հայտնում են, որ հակառակորդը ինչ-որ բանի է նախապատրաստվում:
Մարտի 16-ին Անկարայում Իլհամ Ալիևի՝ «Արևմտյան Ադրբեջան» եզրույթը կիրառող ելույթը Երևանը համարում է Հայաստանի և Լեռնային Ղարաբաղի վրա հարձակում նախապատրաստելու իրեղեն ապացույց: Այսպիսի հայտարարությամբ երեկ հանդես եկավ ՀՀ արտաքին գործերի նախարարությունը:
«Ադրբեջանի ղեկավարի ռազմատենչ հռետորաբանությունը միտված է ամբողջությամբ խաթարելու Հարավային Կովկասում կայունություն հաստատելու ջանքերը և դիմելու լայնածավալ ուժի կիրառման ինչպես Հայաստանի Հանրապետության ինքնիշխան տարածքի, այնպես էլ Լեռնային Ղարաբաղի նկատմամբ,» – ընդգծվում է ՀՀ ԱԳՆ տարածած հայտարարությունում:
Մարտի 14-ի մամուլի ասուլիսի ժամանակ պատասխանելով լրատվամիջոցներից մեկի հարցին՝ վարչապետ Նիկոլ Փաշինյանը ադրբեջանական նոր ագրեսիայի հավանականությունը բարձր համարեց:
«Ես կարծում եմ, որ այո՝ հիմա շատ մեծ է էսկալացիայի հավանականությունը, և՛ Հայաստանի սահմանի երկայնքով, և՛ Լեռնային Ղարաբաղում,» – շեշտում էր վարչապետ Փաշինյանը:
Փետրվարին առնվազն 2 անգամ արտգործնախարար Արարատ Միրզոյանը հայտարարել է, որ չի բացառում էսկալացիայի հնարավորությունը:
Խորվաթ գործընկերոջ հետ երևանյան հանդիպմանը հաջորդած մամուլի համար նախատեսված հայտարարության մեջ նախարար Միրզոյանը նշել է. «Ցավով պետք է արձանագրեմ, որ ի հակառակ Հայաստանի կողմից գործադրվող ջանքերին՝ տարածաշրջանում անվտանգային մթնոլորտը շարունակում է մնալ լարված և փխրուն, զգալի է նոր էսկալացիայի հավանականությունը»:
Մարտի 15-ին Ազգային Ժողովի «Հայաստան» խմբակցության պատգամավորր, պաշտպանության և անվտանգության հարցերի հանձնաժողովի անդամ Աննա Գրիգորյանը պաշտպանության նախարար Սուրեն Պապիկյանից փորձեց ճշտել՝ արդյո՞ք Ադրբեջանի զինված ուժերի կուտակումներ են արձանագրվել Ջերմուկում: Թեև նախարարը պատասխանեց ընդդիմադիր պատգամավորի՝ բանակային կահավորման մասին հարցին, նա անպատասխան թողեց կուտակումների հետ կապված հարցը: Բարձրախոսն անջատելուց հետո, երբ նախարարի տեղակալը նախարար Պապիկյանին հիշեցրեց, որ կուտակումների թեմային չի անդրադարձել, նա ասաց. «Էսկալացիային կանդրադառնամ վերջում, (նիստի) փակ հատվածում…»:
Սահմանային սպառնալիքների ֆոնին օրեցօր ահագնանում է նաև հումանիտար ճգնաժամն Արցախում: Հայաստանի համար Բաքվի ռեժիմի առավելապաշտությունն ու ցեղասպանական նկրտումները, թե՛ Հայաստանի, թե՛ Լեռնային Ղարաբաղի նկատմամբ նոր բացահայտում չեն: Հայաստանը, բնականաբար, միշտ խաղաղության է ձգտել: Այստեղ տեղին է հիշել ԱՄՆ նախկին նախագահ Ջոն Քենեդիի խոսքերը. «Ցավալի փաստ է, բայց խաղաղությունը ձեռք է բերվում միայն երբ պատրաստ ես պատերազմելուն»:
Եվրոպական Միության առաքելության տեղակայումը հայ-ադրբեջանական սահմանի հայկական կողմում, իհարկե, կարելի է հուսադրող քայլ որակել Հայաստանի անվտանգության համար, բայց պետք չէ մոռանալ նաև այն, որ Բաքուն Եվրոպական Միության համար «հուսալի գործընկեր է»:
Արսեն ԱՅՎԱԶՅԱՆ