Միջուկային և ռադիացիոն անվտանգության գիտատեխնիկական կենտրոնը, համագործակցելով Ռադիոակտիվ թափոնների վնասազերծում ՓԲԸ-ի հետ, իրականացնում է ծխի հին տվիչներից (ծխի դետեկտորներ) ռադիոակտիվ աղբյուրների հեռացման և վնասազերծման աշխատանքներ՝ դրանց երկարաժամկետ և անվտանգ պահպանման նպատակով։
Խորհրդային տարիներին Հայաստանում լայնորեն կիրառվել են ծխի դետեկտորներ (տվիչներ), որոնք պարունակել են ռադիոակտիվ նյութեր։
Վերջին տարիներին, մի շարք միջազգային աջակցության ծրագրերի շրջանակում, Կենտրոնը Հայաստանյան բազմաթիվ կազմակերպությունների տարածքներից հայտնաբերել ու դուրս է բերել այսպիսի սարքեր։ Դրանք տեղափոխվել են «Ռադոն» ռադիոակտիվ թափոնների վնասազերծում ՓԲԸ-ի համապատասխան պահեստարան։
Կենտրոնի մասնագետները նմանատիպ ծխի տվիչներից առանձնացնում են ռադիոակտիվ աղբյուրները։ Այնուհետ դրանք տեղադրվում են համապատասխան տարաներում՝ ապահովելու դրանց երկարաժամկետ անվտանգ պահպանությունը։
Եթե Ձեր կազմակերպության տարածքում դեռ առկա են հին տիպի ծխի տվիչներ, խնդրում ենք կապ հաստատել Միջուկային և ռադիացիոն անվտանգության կենտրոնի հետ. հեռ. 010541719:
Միջուկային և ռադիացիոն անվտանգության գիտատեխնիկական կենտրոն
