«Նարեկ Սամսոնյանի մոտ հենաշարժողական խնդիր է առաջացել»,– այսօր «Իմնեմնիմի» փոդքասթի համահեղինակներ Նարեկ Սամսոնյանի և Վազգեն Սաղաթելյանի դեմ ԱԺ նախագահ Ալեն Սիմոնյանի հաղորդման հիման վրա նախաձեռնված քրեական վարույթով քննվող դատական նիստից հետո լրագրողների հետ զրույցում ասաց Սամսոնյանի պաշտպան Ռուբեն Մելիքյանը։
Անդրադառնալով այսօր այս գործով միակ վկայի հարցաքննությանը՝ Ռուբեն Մելիքյանն ասաց, որ բավականին հետաքրքիր հարցաքննություն էր, որը կշարունակվի նաև հաջորդ դատական նիստին․ «Մենք կտեսնենք՝ վկայի հե՞տ գործ ունենք, թե՞ մարդու, որին պետությունն անհանգստացրել է իր քաղաքական հետապնդումը մի քիչ փաստաթղթավորելու համար»։
Կարդացեք նաև
Մելիքյանը չցանկացավ մեկնաբանել վկայի այսօրվա հարցաքննությունը, որը, ի դեպ, կցկտուր էր։ Վկան հայտնել է, որ վիճարկվող հաղորդման բովանդակությանը ծանոթ չէ, հայհոյանքներ չի լսել։
Անդրադառնալով Նարեկ Սամսոնյանի՝ հենասայլակով դատարան գալուն և ձեռք բերած հենաշարժողական խնդիրներին՝ Մելիքյանն ասաց․
«Առաջիկայում անցկացվելիք հետազոտությունները հստակ ցույց կտան՝ այդ ամենը երկու շաբաթից ավելի շարունակվող հացադուլի՞ հետևանքով էր, թե՞ կալանքի՝ ընդհանրապես հաշվի առնելով կալանավայրի պայմանները։ Ես համարում եմ՝ այս ամենը կալանքի հետևանք է։ Հացադուլն էլ է կալանքի հետևանք»։
Արփինե ՍԻՄՈՆՅԱՆ
