«Հոկտեմբերի 10-ին Մինսկում անդամ պետությունների ղեկավարների կողմից հրավիրված գագաթաժողովին կկայացվի որոշումը և դրանից հետո կմնան միայն ներպետական ընթացակարգերը»,-այսօր «Փաստարկ» մամուլի ակումբում լրագրողների հետ հանդիպմանը հայտարարեց ԱԺ ֆինանսավարկային և բյուջետային հարցերի մշտական հանձնաժողովի նախագահ Գագիկ Մինասյանը:
Նա հիմնականում խոսեց այն առավելություններից, որը տալիս է Հայաստանին Եվրասիական տնտեսական միության մուտք ու մանրամասնեց. «Առաջին կարևորագույն քայլը, որը լինելու է ՄՄ անդամակցելուց հետո, ելքի -մուտքի տուրքերից ազատումն է: Հաջորդ առավելությունը՝ սանիտարական նորմերն են և Հայաստանի համար բացվող մեծ շուկան, ինչպես նաև ավելացված արժեքի հարկի մուծման հետաձգումը»:
Պարոն Մինասյանը գտնում է, որ Ռուսաստանի նկատմամբ կիրառվող պատժամիջոցները փոխում է մեր պատկերացումները ռուսական շուկայի վերաբերյալ, որը կար մեկ տարի առաջ. «Մեզ համար առաջանում են նոր հնարավորություններ՝ մեր ապրանքատեսակներն արտահանելու և իրացնելու վերաբերյալ»:
Պարոն Մինասյանի կարծիքով՝ ՀՀ-ն դեռ չմտած ԵՏՄ, օգտվում է կարևորագույն արտոնություններից, օրինակ՝ գազի գինը:
Կարդացեք նաև
Aravot.am-ը հետաքրքրվեց՝ այն, որ ՌԴ վարչապետ Դմիտրի Մեդվեդևի այցը չեղյալ համարվեց դա չի՞ նշանակում, որ ՀՀ-ն այժմ Ռուսաստանի համար առաջնահերթություն չէ, պարոն Մինասյանը պատասխանեց. «Հակառակն է, խնդիրները, որոնք վարչապետների մակարդակով պիտի քննարկվեին քննարկվելու են նախագահների մակարդակով»:
Հիշատակելով այն, որ հեռակա բանավեճ է ծավալվել ԵՏՄ անդամ երկրների միջև, օրինակ՝ Ղազախստանի նախագահ Նուրսուլթան Նազարբաևը արդեն հայտարարում է, թե հնարավոր է իր երկիրը դուրս գա միության կազմից, արդյոք ՀՀ-ին պատիվ բերու՞մ է մուտք գործել մի կառույց, որը դեռ չստեղծված արդեն արժեզրկված է, պարոն Մինասյանը պատասխանեց. «Սա վկայում է այն մասին, որ կառույցը ընդամենը տնտեսական է: Ցանկացած փորձ, որով փորձում են այդ կառույցում իրականացնել քաղաքական գործընթացներ, հանդիպում են անդամ պետությունների հակազդեցությանը: Չեմ բացառում, որ այդ կառույցում կան տնտեսական հակասություններ. սա ևս կարևոր է: Սա ինձ ավելի ու ավելի է սկսում համոզել, որ այստեղ հարաբերություններն առողջ են»:
Պարոն Մինասյանը կարծում է, որ ԵՏՄ-ին կմիանան նաև ՀԱՊԿ անդամ բոլոր երկրները, ինչը մեր անվտանգության համար չափազանց կարևոր է:
Անդրադառնալով ՀՀ երկրորդ նախագահ Ռոբերտ Քոչարյանի մտահոգություններին կապված ԵՏՄ անդամակցության հետ, պարոն Մինասյանն ասաց, թե «այս խնդիրները նոր չեն ծագել»:
Դիտարկմանը, եթե կառույցը բացառապես տնտեսական է, այդ դեպքում Նազարբաևի՝ «Չնեղացնենք մեր հարևան Ադրբեջանին» հայտարարությունն էլ է՞ տնտեսական, պարոն Մինասյանը պատասխանեց. «Այո, տնտեսական է»: Նա վստահեցրեց, որ Ղարաբաղի կարգավիճակի հետ կապված որևէ փոփոխություն չի լինի, մաքսակետ էլ չի տեղադրվի:
Տաթև ՀԱՐՈՒԹՅՈՒՆՅԱՆ
