ՀՊՃՀ-ՈՒՄ ԿԲԱՑՎԻ ՆՈՐ ԱՄԲԻՈՆ Երեկ «Ռոյալ կլուբում» ստորագրվեց պայմանագիր՝ ամերիկյան «Լեդա սիստեմս» բաժնետիրական ընկերության բազայի վրա Երեւանի պետական ճարտարագիտական համալսարանում նոր՝ «Միկրոէլեկտրոնային համակարգեր» միջդեպարտամենտալ ամբիոնի բացման կապակցությամբ։ Նպատակը, ինչպես Հայաստանում ամերիկյան «Լեդա սիստեմս» ընկերության մասնաճյուղի գլխավոր տնօրեն Հովիկ Մուսայելյանն ասաց, «Լեդա սիստեմսի» համար մասնագետներ պատրաստելն է։ Մյուս հիմնական նպատակն էլ Հայաստանում միկրոէլեկտրոնային տեխնոլոգիաների զարգացումն է։ Ըստ ամերիկյան «Լեդա սիստեմս» ԲԸ-ի նախագահ Վահրամ Մուրադյանի, ուսանողները, որոնք սեպտեմբերի 1-ին առաջին անգամ նոր ամբիոնում կուսանեն, ավարտելուց հետո կունենան աշխատանքային տեղեր։ «Մյուս տարի կլինի 2-րդ ընդունելությունը,- ասաց պրն Մուրադյանը,- որում կընդգրկվի մինչեւ 60 ուսանող։ Ուսուցումը կստանան «Լեդա սիստեմսի» հատուկ առանձնացված ամբիոնի տարածքում եւ ուսանողին կապահովենք ծրագրերով, սարքավորումներով»։ Նա տեղեկացրեց նաեւ, որ դասախոսական անձնակազմի հետ նույնպես ուսուցողական եւ հետազոտական աշխատանքներ կտարվեն, որոնց պատվիրատուները կլինեն երկու ընկերությունները՝ «Լեդա սիստեմսը» եւ Հայաստանում կիսահաղորդչային համակարգի «Ամարատ» կենտրոնը։ Հ. ՄՈՎՍԻՍՅԱՆ