ՏՆԱԿՆԵՐԻ ԲՆԱԿԻՉՆԵՐԸ ԴԻՄԱԴՐՈՒՄ ԵՆ Վանաձորի քաղաքապետարանը տնակ-կացարանների տերերին հանձնարարել է մինչեւ ապրիլի մեկը ազատել տնակները՝ դրանք դուրս բերելով զբաղեցրած տարածքից։ Հակառակ դեպքում՝ «Մենք տնակները քաղաքապետարանի միջոցներով կհեռացնենք եւ բնակիչներն այլեւս այդ տնակներից ակնկալիքներ չեն ունենա»,- նշեց Վանաձորի քաղաքապետը՝ իր 2003թ. տարեկան հաշվետվության վերաբերյալ ելույթում։ Քաղաքապետարանի զգուշացմանը մտադիր չեն ենթարկվել Վանաձորի Տիգրան Մեծի 73 հասցեում երկրաշարժի հետեւանքով քանդված շենքի («Ֆոտոէտյուդի») բնակիչները, որոնք 15 տարի է բնակվում են այդ տարածքի տնակներում։ Բնակիչները ժամանակին հրաժարվել են տեղափոխվել «Տարոն» ծայրամասային թաղամասի նորակառույցները, պահանջելով իրենց բնակարան հատկացնել իրենց բնակության վայրում։ Նրանք տեղյակ են, որ այստեղ՝ կենտրոնում շենք է կառուցվելու, բայց նրանք, ովքեր այդ շենքից ակնկալիքներ ունեն, պետք է կառուցման համար գումարային մեծ ներդրումներ կատարեն, քանի որ պետբյուջեով Վանաձորում բնակարանաշինություն չի նախատեսված։ «Ինչո՞ւ պետք է 15 տարի տնակում բնակվելուց հետո էլ գումարներ ներդնենք՝ այդ շենքից բնակարան ստանալու համար, թող գումարներ ներդնեն նրանք, ովքեր այդ շենքում բնակարան չեն ունեցել»,- «Առավոտին» գանգատվեցին «Ֆոտոէտյուդի» բնակիչները, որոնց կարծիքով, իշխանությունները ցանկանում են իրենց «ցրել» տարածքից, որպեսզի հետագայում շենքը տնօրինեն ըստ հայեցողության՝ բնակարաններ հատկացնելով «էլիտար» խավին։ Ի դեպ, Վանաձորի քաղաքապետարանը կոնկրետ գործողություններ է սկսել մեկ այլ՝ Քիմիագործների թաղամասի թիվ 1 տնակային ավանի բնակիչների նկատմամբ՝ նրանց վտարման վերաբերյալ հայցադիմումներ ներկայացնելով Լոռու մարզի առաջին ատյանի դատարան։ ԳԱՅԱՆԵ ՀՈՎՍԵՓՅԱՆ Վանաձոր
