ՍԽԵՖՖԵՐԸ ԽՈՍԵՑ ՃԵՊՈՎ ՆԱՏՕ-ի գլխավոր քարտուղար Յաապ դե Հոոպ Սխեֆֆերը, որ ՀՀ-ում գտնվում է երկրորդ անգամ (նախկինում Հայաստան էր այցելել որպես Հոլանդիայի արտգործնախարար), երեկ հանդիպել է ՀՀ նախագահի, վարչապետի, ԱԳ նախարարի հետ, այնուհետեւ այցելել է ԵՊՀ: Նախագահի նստավայրում ՆԱՏՕ-ի գլխավոր քարտուղարն իր շատ ճեպով տված ճեպազրույցի ընթացքում տեղեկացրեց, որ ՀՀ-ի եւ ՆԱՏՕ-ի հարաբերությունների լրջացման մասին է խոսում այն փաստը, որ մեր երկիրն արդեն ունի իր դեսպանը ՆԱՏՕ-ում, եւ Եվրաատլանտյան դաշինքն էլ իր հերթին ունի իր ներկայացուցիչը՝ ՀՀ-ում: Պարոն Սխեֆֆերը մոռացավ նշել, թե ով է լինելու ՀՀ դեսպանը ՆԱՏՕ-ում, բայց փոխարենը ներկայացրեց Ռոբերտ Ստիվենսին՝ իր ներկայացուցչին: ՆԱՏՕ-ի գլխավոր քարտուղարը նշեց, որ վերջին տարիներին տեղի ունեցած աշխարհաքաղաքական զարգացումների հետեւանքով Հարավային Կովկասը հայտնվել է ՆԱՏՕ-ի ուշադրության կենտրոնում, ռազմավարական նշանակություն է ստացել ՆԱՏՕ-ի համար՝ Եվրաատլանտյան տարածաշրջանի անվտանգության ապահովման եւ ահաբեկչության դեմ պայքարի ֆոնին: ՀՀ-ի հետ Դաշինքի հարաբերությունները եւս, ըստ Յ. դե Հոոպ Սխեֆֆերի, վերջին տարիներին զարգացում են ապրում: Նա ողջունեց ՆԱՏՕ-ի Անհատական գործողությունների ծրագրում մասնակցություն ունենալու Հայաստանի որոշումը: Պարոն Սխեֆֆերը նշեց նաեւ, որ ՆԱՏՕ-ն չի պատրաստվում եւ չի հավակնում որեւէ ձեւով մասնակցել ԼՂ հակամարտության կարգավորմանը, սակայն կողմնակից է հարցի արագ կարգավորմանը: Ցավոք, նա այնքան արագ ավարտեց ճեպազրույցը՝ պատասխանելով ընդամենը երկու հարցի, որ այդպես էլ չիմացանք, թե քննարկվե՞լ է արդյոք Իրաք՝ հայկական զորամիավորում ուղարկելու չարչրկված հարցը: Այս հարցին նա չի անդրադարձել նաեւ ԵՊՀ-ում: Մ. Բ.
