![\"\"](\"https://www.aravot.am/2007/aravot_arm/November/7/p5.jpg\")
«Մենք ենք, մեր սարերը» նախագծի երաժշտական պրոդյուսեր Արսեն Գրիգորյանը դրա մեջ արտառոց ոչինչ չի տեսնում
Սիրված երգիչ Արսեն Գրիգորյանին (Մրո) ամիսներ շարունակ հանդիպում էինք «Շանթ» TV-ի «Ժողովրդական երգիչ» նախագծում՝ ժյուրիի անդամի կարգավիճակով, շուրջ 2 ամիս է, ինչ արվեստագետը նաեւ Հ1-ի «Մենք ենք, մեր սարերը» նախագծի երաժշտական պրոդյուսերն է:
– Փաստորեն, կես տարի դուք զբաղվում եք երկու մրցույթով: Բնականաբար, աշխատանքները կատարվում են ձեր՝ որպես երգչի, սոլո կարիերայի հաշվին, էլ չասենք, որ հանդիսանում եք նաեւ «Հայ երգասաններ» խմբի գեղարվեստական ղեկավարը: Ինչո՞ւ որոշեցիք այդպես ծանրաբեռնվել:
– Բնական է, երկու նախագծերում էլ թիմային աշխատանք է առկա: Մեր նպատակն է շարժել ազգային երգարվեստի բջիջը հենց երիտասարդների մեջ ու նրանց մասնակցությամբ: Երկու մրցույթներն էլ ամենայն մանրամասնություններով ներկայացվում են ժողովրդին: Կարող եմ վստահ ասել, որ այսօր ունենք ոչ միայն ազգային երգին, այլեւ ազգային գաղափարախոսությանը նվիրված երիտասարդություն:
– «Մենք ենք, մեր սարերի» առաջին փուլից հետո փոխվեց ժյուրիի կազմը եւ հեռացան Նունե Եսայանը, Սիրուշոն, Անդրեն եւ Ռուբեն Մաթեւոսյանը: Մի նկատառում եւս՝ այս նախագծում, ի տարբերություն «Ժողովրդական երգչի», մասնակցում են ձեր, Ռուբեն Մաթեւոսյանի եւ Նադեժդա Սարգսյանի ղեկավարած պետական քոլեջի սաները: Ստացվում է՝ տեղին է ընտրված «Մենք ենք, մեր սարերը» խորագիրը…
– Այո, Հ1-ի նախագիծը տարբերվում է «Շանթի» մրցույթից: Նախնական լսումների արդյունքում տիկին Սարգսյանի, պարոն Մաթեւոսյանի եւ իմ սաներից ընտրել ենք 18-ին: Ճիշտ եք նկատել, ժյուրիի նախկին անդամներին փոխարինել են Աննա Մայիլյանը, Ալլա Լեւոնյանը, Աիդա Սարգսյանը եւ Արա Գեւորգյանը: Միայն պետկոնսերվատորիայի պրոֆեսոր, Հայաստանի ժողգործիքների նվագախմբի գեղարվեստական ղեկավար, ի վերջո՝ հայ երգի գիտակ Նորայր Դավթյանն է, որ շարունակում է աշխատանքը ժյուրիի կազմում: Նախորդ անդամների փոխարինումը նորերով՝ հիմնականում պայմանավորված է նրանց գերզբաղվածությամբ: Նախագիծը կտեւի մինչեւ դեկտեմբերի կեսերը: Ինչպես առաջին փուլում, այնպես էլ երկրորդում, մրցելույթից մրցելույթ՝ մնացած 16 անդամներից ժյուրին կընտրի լավագույն 4-ին, իսկ վերջիններին՝ հեռուստադիտողը՝ sms-ներով:
– Որպես երաժշտական պրոդյուսեր, չե՞ք կարծում, որ մասնակիցներին հաճախ խանգարում է ֆոնոգրաման, ինչո՞ւ բոլորը չեն հանդես գալիս կենդանի նվագակցությամբ: Եվ երկրորդ, ճանաչված երգիչների ելույթները նախագծի շրջանակներում այնքան հաճախակի են, որ հեռուստադիտողը մոռանում է մրցույթի մասնակիցների կատարումները:
– Որպես երաժշտական պրոդյուսեր, իմ պարտականությունները սկսվում եւ ավարտվում են մրցույթի մասնակիցների մասով: Աստղերին Հ1-ի ղեկավարությունն է հրավիրում: Այս նախագծի ֆորմատը տարբերվում է եղած այլ մրցույթներից: Նպատակը՝ երիտասարդներին ներկայացնելու հետ մեկտեղ, նաեւ հայտնի էստրադային երգիչների ժողովրդական, աշուղագուսանական երգերը լսելն է: Ինչ վերաբերում է ֆոնոգրամաներին, նախագծի սկզբում բոլոր մասնակիցներին պարզապես կոչ եմ արել օգտվել առիթից եւ հանդես գալ միայն ժողգործիքների կենդանի նվագակցությամբ: Եթե ոմանք դա չեն ընդունում, ապա դա իրենց եւ նրանց ուսուցիչների գործն է:
– Օրերս ավարտված «Ժողովրդական երգիչ» նախագիծը դժգոհություն առաջացրեց հատկապես ապարանցիների շրջանում…
– Ես համարում եմ, որ երեք երիտասարդներն էլ արժանի են գովեստի: Վերջնագիծ հասած Նարեկ Պողոսյանի վոկալ տեխնիկան էր զարգացած, Արմեն Դավթյանի (ում համար ապարանցիները ցույցի են ելել)՝ ձայնային տվյալները: Իսկ նախագծի հաղթող Սեւակ Ամրոյանը աննկարագրելի «ջիգյարով» էր երգում…
