Մեկնարկը՝ մարտի 21-ին
![\"\"](\"https://www.aravot.am/2009/aravot_arm/March/5/p3.jpg\")
ՀՖՖ մամուլի քարտուղարությունից տեղեկացնում են, որ ՀՖՖ նախագահ Ռուբեն Հայրապետյանը հաստատել է ֆուտբոլի Հայաստանի բարձրագույն խմբի առաջնության խաղացանկը:
Այն կմեկնարկի մարտի 21-ին՝ «Հրազդան» ստադիոնում կայանալիք «Կիլիկիա»-«Ուլիս» խաղով եւ եզրագիծը կհատի նոյեմբերի 11-ին՝ «Գանձասար»-«Շիրակ», «Փյունիկ»-«Միկա», «Կիլիկիա»-«Բանանց», «Ուլիս»-«Արարատ» հանդիպումներով:
Սպարապետի հիշատակին
Սպարապետ Վազգեն Սարգսյանի անվան պատանեկան ֆուտբոլի հուշամրցաշարում հայտնի դարձան եզրափակիչի մասնակիցները: Այսօր «Բանանց» ակումբի խաղադաշտում պատվավոր մրցանակի համար պայքարելու են «Փյունիկ 1» եւ «Բանանց 2» թիմերը:
Արտոնագրվեցին
Երեկ ՀՖՖ ակումբների արտոնագրման համակարգի արտոնագրման կոմիտեի (առաջին ատյան) նիստում արտոնագրեր շնորհվեցին ֆուտբոլի Հայաստանի բարձրագույն խմբի առաջնությանը մասնակցող բոլոր ութ թիմերի մայր ակումբներին: Դրանք են՝ «Փյունիկը», «Արարատը», «Գանձասարը», «Միկան», «Բանանցը», «Ուլիսը», «Շիրակը» եւ «Կիլիկիան»:
Սակայն ՈՒԵՖԱ-ի գավաթների խաղարկությանը մասնակցող հավակնորդ թիմերը, իսկ դրան մասնակցելու հնարավորություն ունեն բոլորը, մինչեւ ապրիլի 3-ը պարտավոր են ՀՖՖ արտոնագրման բաժին ներկայացնել իրենց ֆինանսական փաստաթղթերը, որոնք ուսումնասիրելուց հետո կտրվի ՈՒԵՖԱ-ի արտոնագիր:
Որակավորվում են
Փետրվարի 28-ից «Ռեջինա» հյուրանոցում հանրապետության բարձրագույն եւ առաջին խմբերի առաջնությունները սպասարկող ֆուտբոլային 35 մրցավարներ եւ 12 տեսուչներ, որոնց մեջ քիչ չեն նաեւ կանայք, ուսումնամարզական հավաք են անցկացնում, որը ղեկավարում է ՀՖՖ մրցավարական եւ տեսչական բաժնի պետ Արարատ Ճաղարյանը:
Դասընթացները կավարտվեն այսօր:
