Տավուշի մարզկենտրոն Իջեւան քաղաքում ապրիլի 11-ին տեղի կունենա «Արաբկիր» բժշկական համալիր – Երեխաների եւ դեռահասների առողջության ինստիտուտի («Արաբկիր» ԲՀ-ԵԴԱԻ) մասնաճյուղ՝ «Երեխայի զարգացման եւ վերականգնողական կենտրոնի» (ԵԶՎԿ) բացումը:
Մարզերում բնակվող հատուկ կարիքներով երեխաների համար մասնագիտացված վերականգնողական բժշկական ծառայությունները եւ մասնագիտական խնամքն առավել հասանելի դարձնելու նպատակով՝ «Արաբկիր» ԲՀ-ԵԴԱԻ-ն, գործընկերների աջակցությամբ, դեռեւս 2003 թվականին է նախաձեռնել մարզերում մասնաճյուղերի հիմնադրումը: Իջեւանի ԵԶՎԿ-ն բժշկական վերականգնողական ծառայություններ եւ մասնագիտական խնամք է տրամադրելու Տավուշի մարզում բնակվող ֆիզիկական, մտավոր, լսողական, խոսքի, վարքագծային եւ զարգացման այլ հապաղումներով երեխաներին:
Երեխաների վերականգնողական բուժումն ապահովելու համար կենտրոնը համալրված է հատուկ կահույքով, անհրաժեշտ սարքավորումներով եւ գույքով:
Մարզերում գործող երեխաների զարգացման եւ վերականգնողական կենտրոնների շարքում Իջեւանի մասնաճյուղը վեցերորդն է: Նմանատիպ ԵԶՎԿ-ներ «Արաբկիր» ԲՀ-ԵԴԱԻ-ն ստեղծել է նաեւ Սպիտակ, Վանաձոր, Գյումրի, Արմավիր, Գավառ քաղաքներում:
