Անցած շաբաթավերջին ՀՀ Շիրակի մարզի Սարատակ գյուղում տնկվել է 1200 սոճու տնկի: Հետաքրքիր է, որ Սարատակն ունի 1274 բնակիչ, 247 տնտեսություն: Ծառատունկին մասնակցել է նաեւ մարզպետ Լիդա Նանյանը: Տնկիների «պայծառ ապագան» կախված է համայնքի բնակիչներից, համայնքի ու բնության նկատմամբ նրանց հոգատարության աստիճանից: Դատելով մարզի ճանապարհաեզրերի վիճակից, այդ հոգատարությունը կամ չկա, կամ շատ քիչ է. ճանապարհաեզրերի մաքրման աշխատանքները միշտ են արվում, բայց միշտ էլ պատկերը տխուր է: ՀՀ քաղաքացիները մոռացել կամ «մոռացել» են շրջակա միջավայրը, համայնքն ու բնությունը մաքուր պահելու պարտականության մասին: Առավել ցավալի է, որ աղբակույտերով աչքի է ընկնում նաեւ Հայաստանի երկրորդ քաղաքի մուտքը՝ մասնավորաբար Ազատան գյուղի մատույցները:
