Այսօր Aravot.am-ը «Ժառանգության» պատգամավոր Անահիտ Բախշյանից մեկնաբանություն խնդրեց, թե Գագիկ Ծառուկյանի հիմնադրամը երբ ուզեց անապահով ուսանողներին օգնել` ճի՞շտ էր, որ նրան թույլ չտվեցին: Ըստ տիկին Բախշյանի, «Դա կանխվեց նախարարի կողմից եւ կարծում եմ` շատ ճիշտ էր, որովհետեւ դա հաստատ քաղաքական կուսակցականացված ինչ–որ գործընթաց էր»:
Սակայն, ըստ նրա, նույն ձեւով նախարարը պետք է հանրապետականի նկատմամբ լինի, այսինքն` օբյեկտիվ լինի եւ թույլ չտա հանրապետականներին նույնն անել. «Երիտասարդական հիմնադրամը, որը պետք է ծառայի երիտասարդությանը` անկախ իրենց քաղաքական կողմնորոշումից, ծառայում է Հանրապետական կուսակցության երիտասարդներին: Փորձում են ցույց տալ, որ դա այնքան էլ էդպես չէ, բայց այդպես է: Հանրապետական կուսակցության երիտասարդներն ունեն ամենալայն հնարավորությունները: Ի դեպ, «Ժառանգությանն» էլ են առաջարկում` եկեք դուք էլ Աղվերանում հանգստյան տուն կա` դուք էլ վերցրեք, բայց վճարեք: Որպեսզի վարձես հյուրանոցը եւ երեխաներին տանես` իհարկե, գումար է պետք: Մենք չունենք այդ հնարավորությունը եւ դրա իմաստն էլ չենք տեսնում` էստի համեցեք անելու: Կաշառելու մի ձեւ է, էլի»:
Ըստ տիկին Բախշյանի, նախարարը պետք է շատ զգույշ եւ հավասարակշռված տանի բուհերի ապակուսակցականացման գործընթացը` սկսելով խորհուրդների նախագահներից. «Քանի դեռ բուհերի խորհուրդների նախագահները հանրապետության նախագահ են, վարչապետ են, Ազգային ժողովի նախագահ են, ուրեմն ինչ որ ասում են` EPP-ի ականջի համար են ասում»:
Հռիփսիմե ՋԵԲԵՋՅԱՆ
Կարդացեք նաև
