«Այդ որոշումը դեռ ոչինչ չի նշանակում, այն ընդամենը երկու ամիս է տևելու, մինչև ՍԴ-ի հերթական վճիռը կայանա: Զարմանում եմ այն հրճվանքի վրա, որը ՍԴ որոշումին հետևեց: Կասեցնելը ՍԴ-ի պարտականությունն էր»,-այսօր «Հենարան» մամուլի ակումբում անդրադառնալով ՀՀ ՍԴ-ի՝ հունվարի 24-ի որոշմանը՝ կապված պարտադիր կուտակային կենսաթոշակային օրենքի վերաբերյալ, այսպիսի կարծիք հայտնեց «Ժառանգություն» կուսակցության ներկայացուցիչ Անահիտ Բախշյանը:
Փաստաբան Նորայր Նորիկյանը խնդիրը դիտարկեց քաղաքական, սոցիալական և իրավական տեսանկյուններից ու նշեց. «ՍԴ-ն հունվարի 24-ին ընդունել է բացառապես իրավական որոշում: Բայց հնարավոր չէ դրա մեջ քաղաքական բաղադրիչ չգտնել: Այս որոշումն ուղղված է հասարակական տրամադրությունների շոշափմանը: Պատահական չէ, որ մի քանի օր առաջ նախագահը հայտարարեց, թե տարիներ հետո այս ռեֆորմը կհանդիսանա պատմական»:
Արձագանքելով` տիկին Բախշյանն ասաց. «Գուցե նախագահի ասածն էլ դա է, թե վատ է լինելու, զգույշ եղեք, խելոք եղեք: Փաստորեն, ատկատը որպես տնտեսական համակարգի շարժիչ ուժ է դառնում: Այս օրենքի ընդունումը հասարակական պայթյունի կհանգեցնի»:
Իրավաբանն էլ վրդովվեց, թե ինչն էր խանգարում կառավարությանը օրենքը վերլուծվել, առավել պրոֆեսիոնալների կողմից մատչելիորեն մատուցել հասարակությանը: Այնուհետև կասկածի տակ դրեց, թե արդյոք մեզ նման օրենք անհրաժեշտ էր, ինչպիսի սոցիալական ռիսկեր ու վտանգներ է այն պարունակում և արդյոք ժամանակավրեպ չէ:
Կարդացեք նաև
Նորայր Նորիկյանը նկատեց, թե ՍԴ որոշումը մեծամասամբ պայմանավորված է լինելու այն հանգամանքով, թե հասարակությունը և շահագրգիռ կազմակերպությունները ինչպիսի քայլեր կձեռնարկեն: Նա խորհուրդ է տալիս բոյկոտից մինչև համազգային գործադուլի դիմել:
Այն հարցի առնչությամբ, թե ՍԴ-ն ի վերջո ի՞նչ որոշում կընդունի, պարոն Նորիկյանն ասաց. «ՀՀ նախագահը նաև իշխող կուսակցության ղեկավարն է և կառավարության պատասխանատվության կրողը: Ուստի որոշ ճնշումների ներքո ՍԴ-ն որոշակի սրբագրումներ է անելու օրենքում»:
Տաթև ՀԱՐՈՒԹՅՈՒՆՅԱՆ
