Դատելով Սահմանադրական դատարանի որոշումից հետո առաջին մի քանի ժամերի հասարակական արձագանքից, պետք է արձանագրել, որ առաջացել է մի կարևոր խնդիր, որպիսին, օրինակ, առաջացել էր նաև ՍԴ հունվարի 24-ի այսպես ասած՝ ժամանակավոր որոշումից հետո, և որպիսին երևի թե առաջանում է ՍԴ բոլոր որոշումներից հետո: Հասարակությունը փորձում է հասկանալ, թե ի վերջո ինչ որոշում է կայացրել Սահմանադրական դատարանը, ինչ են նշանակում որոշման ութ կետերը, հատկապես 7-րդ կետը, որը ուժի մեջ է թողնում օրենքը մինչև սեպտեմբերի 30-ը, այն դեպքում, երբ ըստ էության օրենքի առանցքային դրույթները ճանաչվում են հակասահմանադրական: Այսինքն, ըստ էության ավելի ու ավելի է ստեղծվում մի իրավիճակ, երբ հաջողության զգացումին փոխարինում է անորոշության զգացումը:
Եվ այստեղ պետք է արձանագրել մի կարևոր դետալ էլ: ՍԴ որոշումից հետո մի շարք գործիչներ, հիմնականում քաղաքական գործիչներ, սկսել են հայտարարել կառավարության հրաժարականի անհրաժեշտության մասին, որ իբր քանի որ ռեֆորմը հակասահմանադրական է, կառավարությունը պետք է հրաժարական տա: Այսինքն, ըստ էության ակնհայտ է քաղաքացիական հաջողությունը քաղաքական նպատակներին ծառայեցնելու միտումը: Որ կառավարությունը պետք է հրաժարական տա, ոչ ոք չի կարող վիճարկել, սակայն ոչ թե այս ռեֆորմի հակասահմանադրականության, այլ առաջին հերթին տնտեսական ծայրաստիճան անարդյունավետ քաղաքականության համար: Այսինքն, կառավարության հրաժարականի հիմքերը շատ ավելի լայն ու խորն են և շատ ավելի շուտ են փորվել, հենց իր իսկ՝ կառավարության կողմից: Սակայն, ի՞նչ իմաստ ունի այսօր հրաժարական բղավել, առավել ևս եթե հրաժարական բղավողների մի ահագին մասը պատրաստվում է ապրիլի 28-ին բարձրացնել այդ հարցը խորհրդարանում և Ազատության հրապարակում: Հրաժարականներ բղավելու, այսինքն՝ քաղաքական կոնյունկտուրայից բխող գործողությունների փոխարեն, այսօր, դատելով հենց հասարակությանն ավելի ու ավելի պարուրող անորոշությունից, շատ ավելի կարևոր է հասարակության իրազեկումը՝ մասնագիտական և քաղաքական գնահատականներով հանրային կարծիքի և հետևաբար նաև ինքնավստահության, հասարակության՝ իր իսկ հաղթանակի հանդեպ վստահության ամրապնդումը, բյուրեղացումը:
Եղիազար Այնթապցի
Հոդվածն ամբողջությամբ կարող եք կարդալ «Ժամանակ» թերթի այսօրվա համարում
