Այսօր կառավարության նիստից հետո լրագրողները ՀՀ էկոնոմիկայի նախարար Կարեն Ճշմարիտյանից հետաքրքրվեցին, թե ի՞նչ կարծիք ունի Վերակառուցման եւ զարգացման եվրոպական բանկի այն կանխատեսման մասին, ըստ որի այս տարի Հայաստանի տնտեսական աճը 0% կլինի: Այս հարցին պարոն Ճշմարիտյանն, ըստ էության չպատասխանեց:
Ճշմարիտյանի խոսքերով` «Մենք մակրոտնտեսական կանխատեսումով, ըստ մեր գործառույթների, ընդհանուր առմամբ չենք զբաղվում: Հիմա նայում ենք զուտ արտադրական ձեռնարկությունների մասով, արտահանման ծավալների մասով, գոյություն ունեցող միջազգային շուկայում ազդեցությունների մասով, որքան որ առանձին սուբյեկտների վրա ազդեցություն կունենա: Առանձին-առանձին ամեն ընկերության հետ տարվում է աշխատանք, այսինքն, այն ընկերությունների, որոնք ունեն արտահանման պոտենցիալ: Ոլորտային քննարկումների ժամանակ նույնիսկ մասնակի խնդիրներով անդրադառնում էինք: Մեր խնդիրը լինելու է նախ՝ աջակցության մեխանիզմները, 2-րդ` ստեղծված նոր կառույցը, գիտեք Հայաստանի զարգացման հիմնադրամ է հիմնադրվել, այն ֆունկցիաները, որոնք մեր տնտեսվարող սուբյեկտները չեն իրականացնում, ասենք՝ իրենց արտադրանքը այլ շուկաներում ներկայացնելու մասով, մենք այդ մասով ուզում ենք, որ պետությունը այդ ֆունկցիան վերցնի, որպեսզի կարողանանք հետագայում էլ աջակցել»:
Ընդ որում, մի հանգամանք եւս. մեծ արտահանումների դեպքում շահութահարկի արտոնություն կտրվի օրենքով, նախագիծն այսօր ներկայացվեց ֆինանսների նախարարության կողմից: Բոլոր գործիքները պետք է կիրառենք, որ մեր արտադրողները ծավալների անկում չունենան:
Լրագրողներից մեկի դիտարկմանը, որ Հայաստանի տնտեսությունը ստագնացիա է ապրում, նախարարն ասաց` «Անձնական եզրակացությունը այլ բան է, պաշտոնականն՝ այլ»:
Կարդացեք նաև
Նախարարն ասաց, որ այս պահին դեռեւս ուսումնասիրություններ են կատարում:
Ճշմարիտյանի ներկայացմամբ` միջազգային տարբեր կառույցներ տարբեր մեթոդներ ունեն տնտեսական աճի կանխատեսումների վերաբերյալ. «Համաշխարհային բանկը տալիս է 3.3% աճ, արժույթի միջազգային հիմնադրամը` այլ, ՎԶԵԲ-ն այլ, ամեն մեկն ունի իր գնահատման մեթոդը: Մեր ուսումնասիրությունները ցույց են տալիս, որ իրական հատվածի հետ աշխատանքն ու նրանց աջակցությունը մի քիչ այլ պատկեր են վերջում տալիս: Մենք կսպասենք վիճակագրության տվյալներին, որը կլինի ամսի 26-ից հետո: Ականատես կլինեք, որ տվյալները, որոնք կանխատեսվում են, որոշակի շեղումներ ունենում են, չգիտեմ` կարող է ունենան, կարող է` ոչ»:
Նելլի ԲԱԲԱՅԱՆ
