Սպառողների միության նախագահ Արմեն Պողոսյանն այսօր «Տեսակետ» մամուլի ակումբում իր վրդովմունքը հայտնեց այն առնչությամբ, որ պետական կառույցները ոչ պատշաճ կերպով են պատասխանում քաղաքացիների բողոքներին եւ հուզող հարցերին:
«Գոյություն ունի նոմինալ եւ կրիմինալ թանկանցում»,-այսպես սկսեց իր խոսքը պրն Պողոսյանը: Ըստ նրա՝ նոմինալ թանկացումը ունի խորը պատճառներ, որոնք վերահսկելի են: Սակայն կրիմինալ թանկացման դեմ դժվար է պայքարելը. «Կան տեխնոլոգիական եւ ավազակային մեթոդներ, որոնց միջոցով ապրանքը թանկացնում են: Օրինակ՝ հացի մեջ մինչեւ 30 տոկոս օդ են լցնում, շաքարավազի մեջ՝ ջուր, կարագի մեջ՝ ջուր, մսամթերքի մեջ՝ սառույց»: Այս պարագայում, ըստ պրն Պողոսյանի, նման երեւույթները ոչ թե առողջությանն են վնաս հասցնում, այլ գրպանին:
Պրն Պողոսյանը պատմում է, որ այս հարցերի շուրջ իրենց կառույցը դիմել է երեք անգամ ՀՀ նախագահին եւ Սննդի անվտանգության պետական ծառայության պետին, առաջարկելով համատեղ կամ ծառայության ուժերով այցելել խանութներ, վերցնել նմուշ ապրանքը, տանել լաբորատորիա, կատարել հետազոտություն՝ կապված գնի, քաշի եւ այլ պարամետրերի հետ. «Երրորդ նամակին ինձ ուղարկել են մի պատասխան, որը կապ չունի եւ չի համապատասխանում այն բանին, ինչի համար դիմել ենք: Փաստորեն նախագահի աշխատակազմում չի գտնվել մի գրագետ մարդ, որը համապատասխան քայլեր ձեռնարկի»:
Պրն Պողոսյանի խոսքով՝ բազմիցս ասված է, որ թանկացումների հիմնական պատճառները անվերահսկելիությունն ու մոնոպոլիզացումն են. «Եթե մարդ ինքը հենց գործարար է եւ օրենսդիր, էլ ինչ գների վերահսկողության մասին կարող է գնալ խոսքը»:
Կարդացեք նաև
Էլյա ՀՈՎՀԱՆՆԻՍՅԱՆ
