ԱՄԿ-ԱԻՄ առաջնորդ Պարոյր Հայրիկեանը, յանձին աիմականների, շնորհաւորում է բոլորի Մայիսի 28-ը՝ Հայաստանի անկախութեան վերականգնման տօնը։ Պարոն Հայրիկեանը մահափորձի յետեւանքով ունի առողջական խնդիրներ եւ այդ պատճառով բացակայում է հանրապետութիւնից։
ԱՄԿ-ԱԻՄ-ը, ստեղծուած լինելով Հայաստանի անկախութիւնը վերականգնելու նպատակով, եղել է նաեւ Մայիսի 28-ը ազգովի նշելու ջատագովը։ 1988թ.-ին, արհամարհելով բոլոր անբարենպաստ հանգամանքները, ԱԻՄ-ը Ազատութեան հրապարկում ծածանեց Եռագոյնը։ Այդ օրը հայութեանը վերադարձուեց Եռագոյնն ու նրա խորհուրդը։ Մայիսի 28-ը դարձաւ Սեպտեմբերի 21-ի փարոսը։
ՀՀ իշխանութիւնները Մայիսի 28-ը նշում են որպէս առաջին հանրապետութեան օր։ Սակայն որեւէ ազգ չի կարող պետականութեան վերաբերեալ տօն ունենալ, որը նախորդի պետականութեան վերականգնմանը՝ անկախութեանը։ Սա հակապատմական լինելուն զուգահեռ նաեւ հակագիտական մօտեցում է։ 2004թ.-ին ԱԻՄ-ը դիմել է ԱԺ նախագահին՝ կոչ անելով անդրադառնալ «Տօների եւ յիշատակի օրերի մասին» օրենքում Մայիսի 28-ին եւ Սեպտեմբերի 21-ին որակական՝ ճշմարիտ իմաստ տալու նպատակով։
Ինչպէս գիտենք՝ Մայիսի 28-ը մատուցւում է որպէս Առաջին հանրապետութեան օր, իսկ Սեպտեմբերի 21-ը՝ Անկախութեան օր։ ԱԺ գրեթէ բոլոր քաղաքական ուժերը դրական արձագանքեցին՝ Մայիսի 28-ն Անկախութեան վերականգնման օր, իսկ Սեպտեմբերի 21-ն Ազգային ինքնորոշման օր վերանուանուելու մեր առաջարկին, սակայն մինչ այսօր որեւէ փոփոխութիւն չի կատարուել։
Կարդացեք նաև
Մայիսի 28-ին որեւէ այլ անուն տալը նշանակում է միտումնաւոր խեղաթիւրել պատմութիւնը եւ խեղել նոր սերնդի մտածելակերպը։ Մեր հարեւան պետութիւնը, որը արհեստածին պետութիւն է, նշում է իր անկախութեան 97-ամեակը, իսկ մեր պետութիւնը, որն ունեցել է հազարամեակների պատմութիւն եւ պետականութիւն, նշում է անկախութեան 24-ամեակը։ Սա դաւադրութիւն է՝ ուղղուած մեր պետականութեան դէմ։ Ազգադաւութեան օրինակ են նաեւ Հայաստանը 2-րդ, 3-րդ հանրապետութիւն կոչելը, որը մեզ տանում է ծայրագավառի կարգավիճակի՝ ԵՏՄ կազմում։
Ազգը միասնականանում է ազգային միասնական կազմակերպութիւն ստեղծելով, իսկ ցանկացած ազգի համար այդ միասնական բազմաբնոյթ կազմակերպութիւնն իր պետութիւնն է։ Անկախութիւն՝ նշանակում է պետութեան, այսինքն՝ ազգային միասնականութեան վերականգնում։ 20-րդ դարում Հայաստանը երկու անգամ վերականգնեց իր անկախութիւնը։ 1918թ. մայիսին այդպիսի խորհրդանիշ դարձաւ Արամ Մանուկեանը, 60-ական թթ.-ին՝ ԱՄԿ հիմնադիր Հայկազուն Խաչատրեանը։
Աւանդոյթի համաձայն, այս օրը ԱԻՄ-ականներս Հանրապետութեան հրապարակից այցելում ենք Հայաստանի ինքնիշխանութեան նուիրեալների՝ Արամ Մանուկեանի, Հայկազուն Խաչատրեանի եւ Մովսես Գորգիսեանի, շիրիմներին՝ մեր յարգանքի տուրքը մատուցելու նրանց։
ԱԻՄ Ներկայացուցչական խորհուրդ
