ԼՂՀ պաշտպանության նախարար Մովսես Հակոբյանին ՀՀ ԶՈՒ գլխավոր շտաբի պետի տեղակալ նշանակելու մասին հարցը հունից հանում է իշխող կուսակցության ներկայացուցիչ պատգամավորներին:
ՀՀԿ խմբակցության պատգամավոր Գագիկ Մելիքյանը լրագրողներին նախատեց, թե եթե ազգը սիրում են՝ նման հարցեր չպետք է տալ: Լրագրողները ընդամենը հետաքրքրվել էին՝ ինչպե՞ս է վերաբերվում ԼՂՀ բարձրաստիճան պաշտոնյաներին ՀՀ-ում պաշտոն տալու երևույթին և արդյոք դա քաղաքական որոշո՞ւմ չէ, եւ պարոն Մելիքյանը պատասխանեց. «Եթե ձեզ թվում է, թե ռազմական համակարգում տեղաշարժը քաղաքական քայլ է, չարաչար սխալվում եք: Մենք պնդում ենք, որ ԼՂՀ-ն անկախ պետություն է»:
Aravot.am-ի այն դիտարկմանը՝ արտաքին քաղաքականության ոլորտում մեր այն դիրքորոշմանը, թե ԼՂՀ-ն անկախ և առանձին պետություն է, չի՞ հակասում նման նշանակումը, պարոն Մելիքյանն արձագանքեց. «Բավականին դրական քայլ է քաղաքական առումով»:
ՀՀԿ-ական պատգամավորը պնդեց, թե մենք երկու պետություն ենք, ԼՂՀ-ն անկախ հանրապետություն է դեռ չճանաչված: Հակադարձմանը՝ այդ դեպքում ինչու՞ են այնտեղից պաշտոնյա բերում ՀՀ-ում նշանակում, պատգամավորն արձագանքեց. «Շատ էլ լավ են անում»:
Կարդացեք նաև
Մեր հարցին՝ Մովսես Հակոբյանին տեսնո՞ւմ է ՀՀ պաշտպանության նախարարի պաշտոնում, պարոն Մելիքյանը կարծիք հայտնեց, թե «բավականին շտապում եք»: Նշենք, որ տեղեկություններ են շրջանառվում, թե այս նշանակմամբ նախապատրաստվում են առաջիկա նախագահական ընտրություններին և Մովսես Հակոբյանին «պատրաստում են» որպես ՀՀ պաշտպանության նախարար:
Հարցին՝ ղարաբաղյան կլանը չի՞ ցանկանում զիջել իր դիրքերը, ՀՀԿ-ական պատգամավորը` ի պատասխան վրդովվեց ու ասաց. «Խնդրում եմ ձեր խոսքերը չափավորեք, գոյություն ունի մեկ ազգ և երկու հանրապետություն»:
Տաթև ՀԱՐՈՒԹՅՈՒՆՅԱՆ
