ՀՀԿ պատգամավորները վաղվանից մեկնում են մարզեր՝ մասնակցելու ռեալիթի շոուների՝ Սահմանադրական փոփոխությունների թեմայով:
ՀՀԿ խմբակցության ղեկավար Վահրամ Բաղդասարյանն այսօր լրագրողների հետ զրույցում այս առնչությամբ ասաց. «Դե, բնականաբար, եթե սկսել է արդեն քարոզչական արշավը, տարբեր շոուներ պետք է լինեն: Ինձ թվում է, որ այդ շոուները ավելի գրավիչ կլինեն հանրության համար, երիտասարդների համար: Տարբեր ֆորմատի հանդիպումներ են կազմակերպում: Անկեղծ ասած, մանրակրկիտ չեմ ուսումնասիրել, թե որ ֆորմատն ինչ է իրենից ենթադրում: Որ սկսվի՝ դուք բոլորդ ականատես կլինեք»:
Վահրամ Բաղդասարյանը տեղյակ չէր, թե կոնկրետ քանի հոգի են իրենց խմբակցությունից մեկնելու մարզեր, երբ ԱԺ-ում նիստ է ընթանում:
Դիտարկմանը, որ տեղեկություն կա՝ մինչեւ դեկտեմբերի 6-ը նրանք գործուղման մեջ են լինելու՝ Վահրամ Բաղդասարյանը հերքեց. «Ոչ, նման բան չկա: Երկու օրով են գնում, մեկ օրով: Մենք այնպես պետք է կազմակերպենք, որ նիստերին որեւէ վնաս չհասնի»:
Կարդացեք նաև
Մեր հարցին՝ աշխատանքային ժամերի՞ն են գնալու՝ Վահրամ Բաղդասարյանը պատասխանեց. «Ոչ, 6-ից հետո»:
Երբ լրագրողները ճշտեցին՝ գործուղո՞ւմ է ձեւակերպվելու պատգամավորների համար՝ Վահրամ Բաղդասարյանը վստահեցրեց, որ ոչ:
Մինչդեռ ՀՀԿ պատգամավոր Կարինե Աճեմյանը, որն ընդգրկված է մեկնողների խմբում, վստահեցրել էր, որ գործուղում է ձեւակերպվել այո-ի շտաբի կողմից եւ այն տեւելու է 20 օր:
Հռիփսիմե ՋԵԲԵՋՅԱՆ
