Ֆինանսների նախարարության Դիլիջանի ուսումնական կենտրոնին կառավարության պահուստային ֆոնդից առաջարկվում է հատկացնել 508 միլիոն դրամ: Այս մասին տեղեկանում ենք կառավարության փետրվարի 18-ի նիստի օրակարգից: Գումարը հատկացվելու է ուսումնական կենտրոնը վարչական սարքավորումներով ապահովելու համար: Ամենայն հավանականությամբ, նախագիծը հավանության կարժանանա:
Ըստ կառավարություն ներկայացրած որոշման նախագծի, Դիլիջանի ուսումնական կենտրոնի շահագործման հանձնումը նախատեսված է 2016 թվականի սեպտեմբերին եւ ուսումնական կենտրոնի բնականոն շահագործումն ապահովելու համար անհրաժեշտություն է առաջացել ձեռք բերել վարչական սարքավորումներ (զանազան կահույք, համակարգիչներ եւ այլն):
Հիշեցնենք, որ այս ուսումնական կենտրոնի համար կատարվող ճոխ ծախսերը պարբերաբար հանրության, տնտեսագետների քննադատությանն են արժանացել: Բացի այս, որոշ տնտեսագետներ ուսումնական կենտրոնի համար կատարվող գնումներում կոռուպցիոն ռիսկեր են տեսնում: Վերջին ճոխ ծախսերն այս կենտրոնի համար եղել են հարկատուների համար թանկ արժեցած օճառամանները, հայելիները, եւ սպասք ձեռք բերելու ծախսերը:
Նելլի ԲԱԲԱՅԱՆ
