Հայաստանում Ֆրանսիական համալսարանի ռեկտոր Ժան-Մարկ Լավեստը՝
Ֆրանսիա մեկնող ուսանողների եւ տարածաշրջանային համագործակցության մասին:
Ավանդաբար Հայաստանում Ֆրանսիական համալսարանի ուսանողները մեկամսյա պրակտիկա են անցնում Ֆրանսիայի տարբեր քաղաքներում: Դրա շնորհիվ նրանք հնարավորություն են ունենում ոչ միայն բացահայտել ֆրանսիական մասնագիտական միջավայրը, այլեւ կապեր հաստատել ֆրանսիացիների ու հայկական սփյուռքի ներկայացուցիչների հետ: Բացի այդ, պրակտիկան արտերկրում մեծապես նպաստում է Հայաստանում լավ վարձատրվող աշխատանք գտնելուն:
Ինչպես «Առավոտի» հետ զրույցում նշեց Հայաստանում Ֆրանսիական համալսարանի ռեկտոր, պրոֆեսոր Ժան-Մարկ Լավեստը, այս տարի Ֆրանսիայում պրակտիկա կանցնեն իրենց լավագույն 44 ուսանողները, որոնք ընտրվել են 75 երիտասարդներից: Ռեկտորը ցանկություն ունի այդ թիվը հետագայում կրկնապատկել, ասում է, որ թիմի ու համալսարանի արտաքին կապերի եւ որակի գծով պրոռեկտոր Արայիկ Նավոյանի հետ աշխատում է այդ ուղղությամբ:
«Մենք ամեն ինչ անում ենք, որպեսզի ուսանողների պրակտիկան Ֆրանսիայում լավ կազմակերպված լինի, եւ այդ 44 ուսանողները արդյունավետ անցկացնեն իրենց ժամանակը: Ինչ վերաբերում է մյուսներին, նրանք էլ Հայաստանում կանցկացնեն պրակտիկան: Ընդհանրապես, ինձ թվում է, որ բակալավրիատն ավարտած ուսանողների համար մեկ ամիսը բավարար ժամանակ չէ պրակտիկայի համար, հետեւաբար որոշել ենք մյուս տարվա ուսումնական պլանով ութ շաբաթ պրակտիկա նախատեսել: Դա նշանակում է ծրագրի փոփոխություն, որը, սակայն, հնարավորություն կտա պրակտիկայի ընթացքում օգտագործել ուսանողների ստացած գիտելիքները: Աշխատաշուկայում մեր ուսանողները հայտնի են ինչպես իրենց մասնագիտական, այնպես էլ մարդկային որակներով: Մենք միշտ աշխատաշուկայից, այսինքն՝ տարբեր ձեռնարկություններից մասնագետների ենք ներգրավում դասավանդելու գործընթացում, ինչը եւս ուսանողներին համապատասխան հմտություններով օժտելու գրավական է»,- հայտնեց Ժան-Մարկ Լավեստը: Նաեւ ասաց, որ պրակտիկայի մեկնող ուսանողներին հիշեցրել է, որ իրենք մեծ պատասխանատվություն ունեն իրենց ուսերին. «Պետք է լավ ներկայացնեն համալսարանն ու երկիրը»: Ռեկտորի խոսքով, որոշ ուսանողներ կհյուրընկալվեն հայկական համայնքներում, մյուսները քաղաքապետարաններում, որոշներն էլ՝ փաստաբանական գրասենյակներում:
Կարդացեք նաև
Նրանց բոլորի թեմաներն այնպես են ընտրված, որ ուսանողները հմտություններով հարստացած կվերադառնան Հայաստան, մեկ ամսվա ընթացքում կկարողանան օգուտ քաղել, հնարավորինս ճանաչել երկիրը, ֆրանսիական մշակույթը եւ վերադառնալով հայրենիք, այդ ամենը կիրառել այստեղ: «Հայաստանը պետք է հպարտ լինի իր այն ուսանողներով, որոնց ուղարկում է Ֆրանսիա՝ երկիր ներկայացնելու: Պետք է ասեմ, որ նրանք իսկապես լավ դեսպաններ են»,- համոզված է Ֆրանսիականի ռեկտորը: Նա փաստում է, որ կան ձեռնարկություններ, որոնք տարիների ընթացքում հավատարիմ գործընկեր են դարձել Ֆրանսիական համալսարանի համար, քանի որ իրենց ուսանողները մշտապես հավուր պատշաճի են իրենց դրսեւորել: Այս տարի կրկնապատկվել է Ֆրանսիական համալսարանի հետ համագործակցող հաստատությունների ու ձեռնարկությունների թիվը: Ռեկտորը հավաստիացնում է, որ այդ հաստատությունները, երբ իմանում են, որ հյուրընկալելու են ուսանողների, որոնք Ժան Մուլեն Լիոն 3 համալսարանի դիպլոմ ունեն, որը շնորհում է Հայաստանում Ֆրանսիական համալսարանը, վստահ են լինում, որ ընդունում են բարձր գիտելիքներ ունեցող երիտասարդների, որոնք վաղը լավ մասնագետներ են դառնալու: Ժան-Մարկ Լավեստը լուրջ հաջողություն է համարում Հայաստանում Ֆրանսիական համալսարանի համար Ժան Մուլեն Լիոն 3-ի նման ակադեմիական գործընկեր ունենալը:
Մեր զրույցի ժամանակ անդրադարձ եղավ նաեւ Ջավախքի հետ համագործակցությանը: Ռեկտորը հայտնեց Ջավախքում ընդունելության նախապատրաստական դասընթացների կազմակերպման ծրագրի մեկնարկի մասին: Ասաց, որ նախապատրաստական դասընթացներ ներդնելով այնտեղ՝ հնարավորություն են տալիս ավելի լավ պատրաստվել ու ընդունվել Ֆրանսիական համալսարան: Նրա հավաստմամբ, ներկայումս 3-4 ուսանող ունեն Վրաստանից, ու իրենց նպատակը զուտ թիվն ավելացնելը չէ, այլ դիմորդների մասնագիտական կողմնորոշմանը նպաստելը եւ ընդունելության մրցույթին նախապատրաստելը: Ռեկտորը հավելեց, որ նախատեսում են, Վրաստանից բացի, համագործակցել Ռուսաստանի հարավի ու Իրանի հետ: Իրենց համալսարանը տարածաշրջանի կրթական շուկայում գրավիչ հաստատություններից մեկն է՝ որակի, մասնագիտական հնարավորությունների եւ ֆրանսիական հավատարմագրման շնորհիվ: Առաջիկայում Ֆրանսիական համալսարանի հնարավորությունները կմեծանան, երբ սկսեն անգլերեն լեզվով մագիստրատուրա ու ասպիրանտուրա իրականացնել, որտեղ անպայման կլինեն ֆրանսերենի դասաժամեր՝ ուսանողներին ֆրանսիական մշակույթի մեջ ներգրավելու համար: Իրանի հետ համագործակցության վերաբերյալ Ժան-Մարկ Լավեստն այս պահին ձեռնպահ մնաց «փակագծեր բացել», ասաց միայն, որ ամեն ինչ դեռ ծրագրերի մշակման փուլում է: Նաեւ հավելեց, որ այդ նպատակով առաջիկա ամսվա ընթացքում նախատեսված է իր այցը Իրան:
ԳՈՀԱՐ ՀԱԿՈԲՅԱՆ
Լուսանկարում` Ֆրանսիա մեկնող ուսանողները՝ ռեկտորի հետ:
