Օգոսոտոսի 8-ին ճանաչված վաղամեռիկ կոմպոզիտոր Հարություն Դելլալյանի ծննդյան օրն է, լրանում է արվեստագետի 79-ամյակը:
Առաջիկայում Հայաստանում նախատեսված են «Դելլալյան» տրիոյի համերգները, իսկ սեպտեմբերի 6-ին Դելլալյան քույրերը կկատարեն հոր սոնատը` ջութակի եւ դաշնամուրի համար:
«Դելլալյան» տրիոն ստեղծվել է 1995թ-ին, Լիսաբոնում (Պորտուգալիա), Հարություն Դելլալյանի երկու դուստրերի` դաշնակահար Մարինա Դելլալյանի, ջութակահար Նարինե Դելլալյանի եւ թավջութակահար Լեւոն Մուրադյանի կողմից:
Aravot.am-ը Նարինե Դելլալյանին խնդրեց սրտի խոսք ասել հոր մասին: Այն չափազանց հուզիչ է ու սրտառուչ. «Հայրս…այսօր Դու կդառնայիր …Ոչ, Մեծությունները չեն դառնում, Նրանք հավերժության ճանապարհն են բռնում ու իրենց գոյությամբ ապրեցնում ու փրկում մեզ։ Իրենք մեզ են հասցնում տիեզերքի լռությունը, կապը լինում մեր ու մեր մեջ…Անշուշտ կցանկանայի տեսնել Քեզ՝ սպիտակած մազերով, մեր հետ, մեր կողքին ու կուզեի անչափ ձեռքդ բռնել ու ուժ ստանալ Քեզանից։ Բայց…Մեծությունների դեպքում կարճ ու երկար կյանք չկա, քանի որ տարիները վայրկյանների արժողություն ունեն, Հավերժությունն է անսահման։ Կարևորը Քո թողած ժառանգությունն է, սրտից ու հոգուցդ ծնված բարձրագույն երաժշտությունը, որը կամուրջն է մեր ու դարերի խորքից եկած արձագանքի միջև։ Երջանիկ եմ, որ Քեզանից մեզ է անցել երաժշտության միջոցով շփվելու ընդունակությունը։ Շնորհակալ եմ թողածդ բոլոր ստեղծագործությունների համար, բայց հատկապես մեզ` Քո դուստրերին նվիրած Սոնատի համար, որ հպարտությամբ կատարում ենք ամենուր։ Տարիներ առաջ, երբ գրում էիր այս Սոնատը, մենք, դեռ փոքրիկ չարաճճիներ ` չէինք էլ գիտակցում…Իսկ Դու գիտեիր։ Այսօր և միշտ, Քո օրն է…»:
Կարդացեք նաև
Գոհար ՀԱԿՈԲՅԱՆ
Լուսանկարները՝ www.dellalian.com կայքից