Վանաձորում ՕԵԿ-ի ավագանու թեկնածու Արկադի Փելեշյանի՝ Վանաձորի Հայ Ավետարանական եկեղեցու առաջնորդ Ռաֆիկ Գրիգորյանին ծեծելու միջադեպն այս օրերին հակասական եւ տարաբնույթ մեկնաբանությունների տեղիք տվեց: Չնայած տարածվեց տեսանյութ, թե ինչպես է Արկադի Փելեշյանը մի խումբ մարդկանց ուղեկցությամբ մտնում եկեղեցի, Ռաֆիկ Գրիգորյանը մի շարք ԶԼՄ-ների պատմել էր, թե ինչպես է Փելեշյանը հարվածել իր գլխին, ՕԵԿ պատգամավորները, միեւնույն է, չեն ընդունում, որ առհասարակ որեւէ միջադեպ է եղել:
Այս առնչությամբ մեզ հետ զրույցում ՕԵԿ պատգամավոր Մհեր Շահգելդյանը այսպես բացատրեց եղելությունը. «Արկադի Փելեշյանը գնացել է Ռաֆիկ Գրիգորյանի մոտ, որովհետեւ խոսակցություններ կային, որ նա ընտրակաշառք է բաժանել՝ ձայներ գնելու համար: Արկադի Փելեշյանը, քանի որ ժամանակին բազմիցս աջակցել է իր հնարավորությունների շրջանակներում այս կազմակերպությանը եւ տվյալ անձնավորությանը, իրենց հավատացյալներին, նա գնացել է, տեղի է ունեցել խոսակցություն: Միգուցե՝ ավելի բարձր տոներով, բայց եղել է պարզաբանման ցանկություն, եթե ընտրակաշառք է բաժանել, ապա ինչո՞ւ է տվյալ եկեղեցին մասնակցել դրան»:
Մենք ճշտեցինք, այսինքն՝ ծեծ չի՞ եղել՝ նա պատասխանեց. «Եղել է բարձր տոներով խոսակցություն»:
Մեր դիտարկմանը, որ եկեղեցու հովիվը բազմաթիվ ԶԼՄ-ների է պատմել, թե ինչպես է գլխի շրջանում հարվածներ ստացել՝ նա պատասխանեց. «Մինչ այդ բազմաթիվ տեսակետներ կար, որ հոսպիտալացվել է, այնուհետեւ դա հերքվեց: Հետո ասացին, որ բուժզննման է ենթարկվել: Եթե որեւիցե խնդիր լիներ, իրեն բուժհաստատությունից բաց չէին թողնի հենց այնպես: Բուժզննման արդյունքում ոչ մի հետք չի հայտնաբերվել, ես ուզում եմ, որ սա պարզ բոլորդ հասկանաք»:
Կարդացեք նաև
Հռիփսիմե ՋԵԲԵՋՅԱՆ
