Ն.Ս.Օ.Տ.Տ. Գարեգին երկրորդ Ամենայն Հայոց Կաթողիկոսի նախագահությամբ այսօր Մայր Աթոռ Սուրբ Էջմիածնում աշխատանքը սկսեց եկեղեցական-ներկայացուցչական վեցերորդ ժողովը, որին մասնակցում են Հայ Եկեղեցու թեմակալ առաջնորդներ, Գերագույն հոգևոր խորհրդի անդամներ:
Ներկաներին ուղղված խոսքում Վեհափառ հայրապետը չշրջանցեց Պոլսի հայոց պատրիարքի ընտրության հարցը: «Մեր զորակցությունն ենք հայտնում Պոլսի հայոց պատրիարքական տեղապահ Գերաշնորհ Գարեգին արքեպիսկոպոս Բեկչյանին եւ հորդորում իրականացնել պատրիարքության ընթացիկ աշխատանքները եւ կազմակերպել հայոց պատրիարքի ընտրությունը»:
Հիշեցնենք, որ առաջիկայում ընտրությունների կազմակերպման գործընթացն է մեկնարկելու: Տ. Գարեգին արքեպիսկոպոս Բեկչյանը թեկնածուների թվում է:
Մարտի 15-ին Պոլսի հայոց պատրիարքի տեղապահ ընտրված, ներկայում Գերմանիայի հայոց թեմի առաջնորդն իր հերթին նշյալ ընտրության գործընթացն ուշացած որակեց. «Բայց կարեւորն անցյալը չէ, այլ գալիքը: Կարծում եմ՝ Պոլսի մեր հոգեւոր եղբայրների հետ համախմբմամբ, ներդաշնակ աշխատանք կկատարենք, եւ առաջիկա ընտրությունները կանցնեն խաղաղ՝ եղբայրական մթնոլորտում»:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
