Նախկին ամուսնու նկատմամբ բռնություններ կատարելու համար մեղադրվող Թագուհի Մանսուրյանն այսօր դատական նիստի ժամանակ հայտարարեց, որ նախկին ամուսինը արատավորել է իր պատիվն ու արժանապատվությունը՝ պարբերաբար իր հասցեին ուղղված հայտարարություններով, թե եթե ինքն աշխատանքից ուշ է վերադառնում, ապա անբարոյական է:
Թագուհի Մանսուրյանը նաեւ պահանջեց պարտավորեցնել իր նախկին ամուսնուն հերքել իր պատիվն ու արժանապատվությունն արատավորող այդ հայտարարությունները:
Դատարանն այսօր մեղադրանքի հիմքում դրված փաստաթղթերի հետազոտության ժամանակ ուսումնասիրեց նաեւ Թագուհի Մանսուրյանի ներկայացրած տեսանյութը, թե ինչպես է Վլադիկ Մարտիրոսյանը խանութի մոտակայքում հարվածել իր հորը՝ Վաչագան Մանսուրյանին ու փախել: Դատական հաջորդ նիստը նշանակվեց օգոստոսի 15-ին:
Հիշեցնենք, որ ըստ մեղադրական եզրակացության Թագուհի Մանսուրյանին մեղադրանք է առաջադրվել այն բանի համար, որ նա 2016թ. հունիսի 12-ին ժամը 01:00-ի սահմաններում, Երևան քաղաքի Ս.Տարոնցի նրբանցքի 7 շենքի դիմաց նախկին ամուսնու` Վլադիկ Մարտիրոսյանի կողմից որդուն տեսակցելու հարցի շուրջ վիճաբանել է վերջինիս հետ, որի ընթացքում Վ.Մարտիրոսյանի նկատմամբ կատարել է բռնի գործողություններ, այն է` դիտավորությամբ ճանկռել է նրա պարանոցը` պատճառելով ֆիզիկական ցավ:
Բացի այդ, Թ.Մանսուրյանը, 2016թ. հուլիսի 8-ին ժամը 01:00-ի սահմաններում, որդուն տեսակցել չթույլատրելու համար վիճաբանել է Վ.Մարտիրոսյանի հետ, որի ընթացքում վերջինիս նկատմամբ կատարել է բռնի գործողություններ, այն է` դիտավորությամբ ճանկռել է թևերը` պատճառելով ֆիզիկական ցավ:
Բացի այդ, Թ.Մանսուրյանը, 2016թ. հունիսի 3-ին ժամը 01:30-ի սահմաններում, որդուն տեսակցել չթույլատրելու համար վիճաբանել է Վ.Մարտիրոսյանի հետ, որի ընթացքում վերջինիս նկատմամբ կատարել է բռնի գործողություններ, այն է` դիտավորությամբ ճանկռել է նրա ձեռքերը` պատճառելով թեթև վնասի հատկանիշ չպարունակող մարմնական վնասվածք:
Արփինե ՍԻՄՈՆՅԱՆ
