Սեպտեմբերի 1-ին աշխատանքային այցով Գյումրի է ժամանելու ՀՀ կառավարության ղեկավար Կարեն Կարապետյանը։ Սպասվածին հակառակ՝ այս անգամ նրա այցը ոչ թե Գյումրու պատմական կենտրոնը տուրիստական գոտու վերածելու ծրագրի հետ է կապված, այլ պետական ծրագրերի իրականացման։ Կարեն Կարապետյանը գալիս է տեսնելու, թե ինչպես են իրականացրել պետական ծրագրերը, եթե նորմալ իրականացվել են՝ լավ, եթե՝ ոչ, պարտադիր պիտի մատնանշեն մեղավորներին։
Կառավարության ղեկավարին նաև զեկուցելու են, թե ինչպես են համայնքներն աշխատում մասնավոր հատվածների հետ։ Չի բացառվում, որ վարչապետի հետ հանդիպմանը հրավիրվեն նաև համայնքապետերն ու ձեռնարկատերերը։
Հանդիպման ձևաչափը դեռ անհայտ է, սակայն հայտնի է, որ հանդիպումը լինելու է փակ, ժամը 15․00-ին՝ Շիրակի մարզպետարանում։
Ու քանի որ ձևաչափը դեռ հայտնի չէ, Շիրակի մարզպետարանի վարչության պետերը բավական լարված են, կարելի է ասել՝ շատ խառն են․ նրանցից յուրաքանչյուրը հաշվետու զեկույց է նախապատրաստում իր ոլորտի մասին՝ մատնանշելով խնդիրներն ու դրանց լուծման ճանապարհները։
Ինչպես կատակում են շիրակցի պաշտոնյաները՝ սեպտեմբերի 1-ի՝ գիտելիքի օրվա կապակցությամբ վարչապետի մոտ պատրաստվում ենք քննություն հանձնելու։
Ի դեպ, մենք ականատես եղանք, թե որոշ վարչության պետեր ինչ բծախնդրությամբ են նախապատրաստվում վարչապետի հետ հանդիպմանը, զեկույցը գրում, ջնջում են՝ տեքստը փոփոխությունների ենթարկելով։
Նունե ԱՐԵՎՇԱՏՅԱՆ
