Այսօր գյուղատնտեսության նախարարի տեղակալ Ռոբերտ Մակարյանը վստահեցրեց, որ խաղողի մթերման գործընթացում խնդիրներ չեն առաջանա, հակառակը մի բան էլ խաղողի պահանջարկ կա: Նախարարությունում կազմակերպված ասուլիսում պարոն Մակարյանն ասաց, որ մթերումներն արդեն սկսվել են, եւ կոնյակի գործարանը խաղողագործներից կիլոգրամը 130 դրամով է խաղողը մթերում:
«Քանի որ խաղողի պահանջարկ կա, վերամշակողները սկսել են իրարից «պայմանագրեր գողանալ», այսինքն` իրենք են ցանկանում գյուղացիների հետ պայմանագրեր կնքել, որպեսզի երաշխավորված իրացնեն»,-ասաց փոխնախարարը` խաղողագործներին կոչ անելով առանց պայմանավորվածությունների գործարաններին չհանձնել, հետո` վճարումների հետ խնդիրներ ունենալ:
Մանրամասները` տեսանյութում
Aravot.am-ի հարցին, թե ինչո՞ւ է խաղողի պահանջարկ առաջացել` ցրտահարությունն է պատճառը, թե գյուղացիները հրաժարվել են այգիները մշակել, պարոն Մակարյանը պատասխանեց, որ հիմնական պատճառը ցրտահարություններն էին եւ որ գյուղացիները այգիները չէին թաղել. «Իսկ պահանջարկի ավելացման ամենակարեւոր գործոններից մեկը արտահանման ծավալներն աճել են թե գինու, թե կոնյակի մասով»:
Ռոբերտ Մակարյանի տվյալներով, արտահանվել է 78 հազար տոննա պտուղբանջարեղեն, որից 74 հազար տոննան Ռուսաստան, 3500 տոննան` Վրաստան, մնացածը` Արաբական միացյալ էմիրություններ, Բելառուս, Ուկրաինա: Փոխնախարարն ասաց, որ գյուղացիական տնտեսությունների համար ցածր` 5 % տոկոսադրույքով վարկեր կտրամադրեն` 3-10 միլիոն դրամի չափով:
Մայրաքաղաքում գործող գյուղատնտեսական շուկաներին էլ կավելանա եւս մեկը, որը կբացվի Նոր Նորքի 1-ին զանգվածում:
Լուսինե ԲՈՒԴԱՂՅԱՆ
