«Գլխավոր խնդիրն այն է, որ ներկայում չունենք Արցախյան հակամարտության կարգավորման իրական բանակցային գործընթաց: Այդ հարցում լուրջ առաջխաղացում հնարավոր չէ՝ առանց Վիեննայի եւ Սանկտ-Պետերբուրգի պայմանավորվածությունների, այդ թվում՝ հետաքննության մեխանիզմների ներդրման»,-«Կովկասի ինստիտուտի»՝ ԼՂ հակամարտությանը նվիրված այսօրվա քննարկման ժամանակ ասաց «Կովկասի ինստիտուտի» փոխտնօրեն, քաղաքագետ Սերգեյ Մինասյանը:
Նրա բնորոշմամբ՝ նշյալ խնդիրը մեծամասամբ պայմանավորված է Ադրբեջանի մոտեցումներով, որն այդ հարցում շահագրգռված չէ. «Իրական փաստաթուղթը, որը բանակցային սեղանին է, Կազանյան փաստաթուղթն է, որի շուրջ Ադրբեջանը հրաժարվում է բանակցային գործընթաց վարել: Ադրբեջանի վերաբերմունքը դրա շուրջ ավելի քան բացասական է, քանի որ այդ փաստաթղթում կա ԼՂՀ կարգավիճակի հաստատման հարցի կետը»:
Սերգեյ Մինասյանի խոսքով՝ նավթի արդյունահանման ծավալների կրճատման եւ նավթի գների անկման հետեւանքով Ադրբեջանում խորացող տնտեսական ճգնաժամը հանգեցնում է նրան, որ վերջինիս ղեկավարությունն ավելի կոշտ է դառնում Արցախի հարցում. «Զուգահեռ, ՀՀ-ում եւ ԼՂՀ-ում կոշտանում է մոտեցումը փոխզիջումների հանդեպ»:
Քաղաքագետն անդրադարձավ նաեւ Ադրբեջանի՝ ԵՏՄ անդամ դառնալու հավանականությանը՝ ասելով, որ այս պահին տվյալ հարցն արդիական չէ:
Լուիզա ՍՈՒՔԻԱՍՅԱՆ
