«Արցախյան հակամարտության գոտում հանկարծակի պատերազմի՝ ռազմական գործողությունների վերսկսման վտանգը ներկայում չափազանց բարձր է, որի հետեւանքները շատ թանկ կարող են լինել կողմերի համար»,-«Կովկասի ինստիտուտի» կազմակերպած՝ «Անվտանգությունն և դիվանագիտությունը Լեռնային Ղարաբաղի հակամարտությունում. նոր փու՞լ» խորագրով քննարկման ժամանակ այսօր հայտարարեց «Տարածաշրջանային հետազոտությունների կենտրոնի» տնօրեն, քաղաքագետ Ռիչարդ Կիրակոսյանը: Նրա համոզմամբ՝ ռազմական գործողությունների վերսկսումը կանխող գործոններն են բավականին նվազ, իսկ պետական պաշտոնյաների կողմից քաղաքական կամքի պասիվության խնդիր կա երկու կողմերում էլ:
«Դժբախտաբար, Ադրբեջանը կարողացավ հաջողությամբ ստիպել փակել ԵԱՀԿ երեւանյան գրասենյակը, ինչը հարված հասցրեց տարածաշրջանային անվտանգությանը: Մինսկի խումբը հիմա շատ վատ վիճակում է, իսկ միջնորդական գործընթացը կարելի է դժգույն անվանել»,-նկատեց փորձագետը: Նրա բնորոշմամբ՝ ԵԱՀԿ Մինսկի խմբի միջնորդական գործունեությունը քննադատության է արժանի, քանի որ ԼՂՀ-ն դեռեւս բանակցային կողմ չէ. «Մտահոգիչ է նաեւ այն, որ Մինսկի խումբը բավարար տեղեկատվություն չի հաղորդում խաղաղության հաստատման ճանապարհների մասին, ինչն էլ հասարակական մեկնաբանությունների տեղիք է տալիս: Մտահոգիչ է նաեւ Թրամփի վարչակարգի՝ Կովկասյան տարածաշրջանի առնչությամբ անորոշ քաղաքականությունը, ինչը եւս ազդում է Մինսկի խմբի վրա»:
Կիրակոսյանը կարծում է, որ Մինսկի խմբի ներսում ԱՄՆ դերակատարությունը խիստ նվազեցնելու, եւ, հակառակը՝ ՌԴ-ի դերը բարձրացնելու միտում կա:
Անդրադառնալով Մինսկի խմբի արդեն նախկին ամերիկացի համանախագահ Ռիչարդ Հոգլանդի` Արցախյան հակամարտության կարգավորմանն առնչվող հայտարարությանը՝ Ռիչարդ Կիրակոսյանը նշեց. «Փոխզիջումը պետք է լինելու…ՀՀ-ն հիմա չունի խաղաղության հանձնառու գործիքներ, բայց ՀՀ կառավարությանը պետք է հիշեցնել՝ ԼՂ-ից անդին ընկած տարածքները սակարկային առավելություն ունեն: Դա պարբերաբար պետք է հիշեցնել»:
Լուիզա ՍՈՒՔԻԱՍՅԱՆ
