Ինչպես ավելի վաղ հայտնել էինք, 2016թ. Ոստիկանության ՊՊԾ գունդը գրաված եւ ծանր հանցագործությունների մեջ մեղադրվող «Սասնա ծռեր» խմբի անդամներից 14-ի գործով դատական նիստին այսօր 15 պաշտպաններ չէին ներկայացել՝ որպես բողոքի ակցիա դատարաններում իրենց հանդեպ ապօրինի խուզարկությունների դեմ: Փաստաբաններից Հայկ Ալումյանը դատարանում էր, բայց նիստերի դահլիճ չմտավ, որովհետեւ դեմ է զննությանը: Նա գործադուլին էլ չի մասնակցում:
«Չեմ համարում, որ մեզ խուզարկում են: Համարում եմ, որ մեզ զննում են, բայց միշտ դեմ եմ եղել դրան, հատկապես որ արգելված իրերի ցանկ չկար»,-լրագրողների հետ զրույցում ասաց նա: Ալումյանը փաստեց՝ արգելված իրերի ցանկ արդեն իսկ սահմանվել է, սակայն՝ այնպիսի իրավական ակտով, որով փաստաբանի վրա պարտավորություն դրվել չի կարող. «Դատարանների նախագահների խորհրդի որոշումն ուղղված է կարգադրիչներին եւ ասված է, թե նրանք ինչը չպետք է ներս թողնեն: Այդ ցանկով ինձ արգելվում է որոշակի իրեր բերել դատարան, սակայն ինձ որեւէ բան արգելող իրավական ակտը չի կարող օրենքից ցածր լինել: Այսինքն, ցանկացած քաղաքացու օրենքով պետք է արգելեն»:
Ալումյանը հույս ունի, որ այդ ցուցակն օրենքով կսահմանեն, ոչ թե դատարանների նախագահների խորհրդի որոշմամբ: Հայկ Ալումյանն անդրադարձավ նաեւ արգելված իրերի ցանկին, որը շատ փաստաբանների համար է ծիծաղելի: «Երբ երգիծական հաղորդում լինի, կմեկնաբանեմ հարցը»,-ասաց նա:
Լուիզա ՍՈՒՔԻԱՍՅԱՆ
