Նուռը աշնանը հասունացող մրգերից է, որը առանձնանում է իր յուրահատուկ համով եւ օգտակարությամբ: Այս մրգի առավելություններից մեկը նաեւ այն է, որ կեղեւը եւս օգտակար է եւ դրա մասին իմացողները դեն չեն նետում այն:
Նռան պատրաստուկները օժտված են ընդհանուր կազդուրիչ, խթանող, հակաբորբոքային, հակալուծային, ցավազրկող, հակաճիճվային, ջերմիջեցնող եւ վերքերը լավացնող ազդեցությամբ: Հյութը կիրառվում է որպես ընդհանուր կազդուրիչ միջոց ծանր վարակիչ հիվանդություններից եւ վիրահատություններից հետո, նաեւ՝ արտաքին այրվածքների, բորբոքային պրոցեսների ժամանակ: Կեղեւի եփուկը կիրառվում է լյարդի, երիկամների, բերանի խոռոչի բորբոքային հիվանդությունների, հոդացավերի ժամանակ:
Սակավարյունության՝ անեմիայի, մտավոր եւ ֆիզիկական գերհոգնածության, հետվիրահատական շրջանում, որպես ընդհանուր կազդուրիչ միջոց, խորհուրդ է տրվում թարմ քամած նռան հյութն ընդունել 0,5 բաժակից օրը 3 անգամ՝ ուտելուց առաջ:
Ճիճվային հիվանդության ժամանակ առաջարկվում է 40-50 գրամ մանրացված նռան կեղեւին ավելացնել 2 բաժակ ջուր, թրմել 6 ժամ, այնուհետեւ եռացնել մինչեւ հեղուկի ծավալը կրճատվի եւ հասնի 1 բաժակի, քամել, սառեցնել: Ընդունել 1 բաժակը 1 ժամվա ընթացքում, 30 րոպե հետո լուծողական խմել:
Քրոնիկական հազի, փորլուծության դեպքում 1 ճաշի գդալ նռան կեղեւին ավելացնել 1 բաժակ եռման ջուր, թրմել՝ կափարիչը ծածկած, մինչեւ հեղուկը դառնա վարդագույն: Ընդունել 1 բաժակը օրվա ընթացքում՝ տաք վիճակում:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ» օրաթերթ
28.09.2017
