Այսօր արդարադատության նախարար Դավիթ Հարությունյանից լրագրողները հետաքրքրվեցին՝ դուք համամի՞տ եք, որ եվրոպական դատարանների որոշումների համար պատասխան տան նաեւ մեր դատավորները՝ վճարելով սեփական գրպանից: Դավիթ Հարությունյանը պատասխանեց. «Ընդհանրապես պատասխանատվություն կրում ենք բոլորս: Եթե նկատի ունեք պատասխանատվություն ֆորմալ առումով՝ ոչ: Իսկ որ դատավորը վճարի՝ դա անթույլատրելի մոտեցում է: Ընդհանրապես դատական իշխանության առանձնահատկությունն ու փիլիսոփայությունն է դա, որ դատավորն իր գրպանից չպետք է վճարի: Երկրում ստեղծվում է դատական համակարգ եռաստիճան, որը պետք է ամեն ինչ անի, որ հասցնի պատշաճ արդարադատության իրականացմանը: Եվ եթե այդտեղ՝ այդ համակարգում սխալ կա, դրա պատասխանատուն առաջին հերթին դատավորը չէ»:
Դիտարկմանը` ստացվում է՝ հարկատուն՝ ժողովուրդն է վճարում՝ Դավիթ Հարությունյանն արձագանքեց՝ «Շատ ճիշտ եք ասում՝ երկիրը: Եվ դրա համար երկիրը քայլեր է ձեռնարկում, որպեսզի ապահովի ավելի որակյալ արդարադատություն»:
Հռիփսիմե ՋԵԲԵՋՅԱՆ