Արդեն երրորդ օրն է, ինչ Վանաձորի երիտասարդները եւս ցույցեր են իրականացնում: Նրանք տարբեր կոչերով ու վանկարկումներով շրջում են Վանաձորի փողոցներով ու կրթական հաստատություններով, կոչ անելով միանալ դասադուլ, գործադուլին: Երեկ օրվա ավարտին, եւ այսօր առավոտից ցուցարարներին էր միացել նաեւ «Երկիր Ծիրանի» կուսակցության առաջնորդ Զարուհի Փոստանջյանը:
Երեւանից Վանաձոր էր եկել նաեւ մայրաքաղաքում բողոքի ցույցի մասնակից, ակտիվիստ Միքայել Մարգարյանը:
Սկզբնական շրջանում ցույցի մասնակիցները համերաշխ շրջում էին քաղաքի դպրոցներով ու բուհերով՝ հորդորելով մասնակցել երթին: Սակայն քիչ անց մասնակիցների միջեւ պառակտում սկսվեց: Միքայել Մարգարյանն առաջարկում էր Վանաձորից շարժվել դեպի Երեւան, միանալով Նիկոլ Փաշինյանի գլխավորած «Իմ քայլը» շարժմանը: Այս առաջարկը, սակայն, Զարուհի Փոստանջյանին դուր չեկավ: «Մենք Նիկոլի հետ գործ չունենք, սա ազգային շարժում է: Երեխաներն ովքեր ուզում են թող գան, բայց դու ինչի՞ ես կիսել էս երեխաներին: Դուք սադրիչ եք, դուք կիսեցիք երթը»:
«Վանաձորը չի համախմբվում, որովհետեւ չի տարվում համապատասխան աշխատանք, որպեսզի իրազեկվեն, տեղյակ լինեն իրավիճակից, եւ համապատասխան գործողություններ իրականացնեն իրենց համախմբվելու համար»,- ասաց Միքայել Մարգարյանը:
Վանաձորցի երիտասարդներին դուր չեկավ ստեղծված իրավիճակը: Նրանք հայտարարեցին, որ իրենց առաջնորդ պետք չէ: Եւ իրենք կարող են ինքնուրույն շարունակել իրենց սկսած գործը. «Մեր բոլոր որոշումները կայացնում էինք միասին եւ մեր բոլոր գործողությունները կառավարվում էին միասին: Մեզ առաջնորդ պետք չէ, եւ մենք ինքներս կարող ենք մեր ցույցն անել»:
Այնուհետեւ ցույցի մասնակիցները բաժանվեցին խմբերի՝ մի մասը մնաց Փոստանջյանի հետ, մյուս մասը՝ Միքայելի, իսկ մնացած մասը՝ գնացին տուն:
Տաթեւիկ ՂԱԶԱՐՅԱՆ
արդէն երեխաների քնելու ժամն է, չէ՞… դաւայ երեխէք, ալ գնացէք տուն, մշիկ-մշիկ քնացէք… դասերն ալ չմոռանաք, հա՞…