Այսօր խորհրդարանում ՀՀԿ-ական «դեսանտ» էր իջել: Խորհրդարան էին եկել պաշտպանության նախկին նախարար Վիգեն Սարգսյանը, արդարադատության նախկին նախարար Դավիթ Հարությունյանը: Նրանք բավական երկար`մի քանի ժամ, մնացին խորհրդարանում:
ՀՀԿ խմբակցության ղեկավար Վահրամ Բաղդասարյանի սենյակում թեժ քննարկումներ էին: Թե ի՞նչ էին քննարկում ՀՀԿ-ականները`ոչ ոք չասաց:
Վիգեն Սարգսյանն ասաց`ոչինչ չի մեկնաբանելու: Դավիթ Հարությունյանն էլ ասաց` եկել է ընկերներին տեսության:
Դավիթ Հարությունյանը նաեւ ՀՅԴ-ական ընկերոջը տեսավ. Արմեն Ռուստամյանի հետ ջերմ բարեւեցին:
Վահրամ Բաղդասարյանը կարկառուն ՀՀԿ-ականների այցը խորհրդարան տարօրինակ չհամարեց: Հիշեցրեց` իրենց կուսակցության ղեկավար մարմնի անդամներ են Վիգեն Սարգսյանն ու Դավիթ Հարությունյանը:
Ի դեպ, Վահրամ Բաղդասարյանն այսօր լրագրողների հարցերին չէր պատասխանում: Ասաց`զբաղված է: Ելույթ է գրում: Հավանաբար, վաղը քննարկվելիք կառավարության ծրագրի վերաբերյալ ելույթի մասին է խոսքը: Այդ ընթացքում էր, որ Դավիթ Հարությունյանը եւ Վիգեն Սարգսյանը Վահրամ Բաղդասարյանի աշխատասենյակում էին:
Նելլի ԳՐԻԳՈՐՅԱՆ