2014-ին ԱԺ-ն ընդունեց «Հանրակրթության մասին» օրենքում փոփոխություններ կատարելու մասին օրենքը. «ՀՀ բոլոր դպրոցները մինչ 2025 թվականը պետք է կարողանան իրականացնել ներառական կրթություն»:
Այս համակարգի նպատակն այն է, որ բոլոր երեխաները պետք է սովորեն հավասար պայմաններում, ինչը կբացառի նաև խտրականությունը:
Սակայն ինչքանով է արդյունավետ նման տարբերակով կրթել երեխաներին և ներկայումս ինչ դժվարություններ կան: Այս հարցերի պատասխանը փորձեցինք ստանալ զրուցելով «ԷԽՈ» հաշմանդամություն ունեցող անձանց իրավապաշտպան ՀԿ նախագահ Սերյոժա Օհանջանյանի հետ:
«Ներառական կրթությունը դինամիկ զարգացող գործընթաց է և ժամանակ է պետք,որպեսզի այն իր տեղը գտնի կրթական համակարգում: Քանի որ այն Հայաստանում նոր է կիրառվում, դեռևս կան թերացումներ, իրականացման հետ կապված դժվարություններ, սակայն ժամանակի ընթացքում ամեն ինչ կկարգավորվի»,- նշեց Սերյոժա Օհանջանյանը:
Նա նշեց, որ հնարավոր չէ կազմել այնպիսի ծրագիր, որը հարմար լինի բոլորին. ամեն երեխա իր պահանջներն ունի:
Նաև հավելեց, որ սա Հայաստանի ձեռբերումներից մեկն է կրթական համակարգում:
Ներառական կրթական համակարգում աշխատող ուսուցչուհիներից մեկը, որն անձնական պատճառներն ունենալով՝ չցանկացավ ներկայանալ, մեզ հետ զրույցում ասաց. «Միանշանակ սկզբնական շրջանում դժվար է նման ձևաչափով աշխատելը, քանի որ երեխաները տարբեր են նրանց հնարավորությունները նույնպես, ինչպես նաև այս ձևով աշխատելու պրակտիկայի պակաս կա, սակայն ժամանակի ընթացքում բոլոր դժվարությունները հարթվում են»:
Աշտարակի Պ. Պռոշյանի անվան ներառական դպրոցի հոգեբան Մարգարիտա Ազիզյանն էլ նշեց հետևյալը. «Չենք թողնում, որ երեխաները որևէ տարբերություն զգան, թեև առանձին պարապմունքներ ենք անցկացնում նրանց հետ: Ցանկանում եմ նաև նշել, որ առողջական խնդիրներ ունեցող երեխաներին համադասարանցիները ոչ թե խղճում են, այլ պարզապես ավելի ուշադիր են»:
Հոգեբանը նաև նշեց, որ այս համակարգի առավելություններից է այն, որ առողջական խնդիրներ ունեցող երեխաները ավելի հեշտ են ինտեգրվում առողջ միջավայր, իսկ մնացած աշակերտներն էլ ավելի բարի են դառնում:
Ըստ «Բոլորակ» հաշմանդամություն ունեցող երեխաների ծնողների համար նախատեսված հարթակի, 2014թ. դրությամբ ՀՀ ԿԳ նախարարի հրամանով Հայաստանում գործում է 139 ներառական դպրոց Երևանում և մարզերում:
Աննա Ղուկասյան
ԵՊՀ ժուռնալիստիկայի ֆակուլտետ, 4-րդ կուրս
