Հաշվի առնելով վերջին օրերին համացանցում լայն տարածում գտած ԼԳԲՏ քրիստոնյաների ֆորումի վերաբերյալ քննարկումները, խտրական, զրպարտող և վիրավորանք պարունակող կոչերը, խեղաթյուրված տեղեկատվությունը, 2018թ-ի հոկտեմբերի 5-ին անցկացված և առաջիկայում նախատեսվող բողոքի ակցիաներն ընդդեմ ԼԳԲՏ քրիստոնյաների ֆորումի, ինչպես նաև այդ բողոքի ակցիայի ակտիվիստների կողմից մարդու իրավունքների պաշտպանությամբ զբաղվող ՔՀԿ-ների և իրավապաշտպանների, մասնավորապես «Նոր Սերունդ» Մարդասիրական ՀԿ-ի նկատմամբ ատելության կոչերը՝
ՀԱՅՏԱՐԱՐՈՒՄ ԵՆՔ
- ՀՀ Կառավարությունը՝ ի դեմս վարչապետ Նիկոլ Փաշինյանի, չունի որևէ առնչություն ԼԳԲՏ քրիստոնյաների ֆորումի կազմակերպման, հյուրընկալման կամ ֆինանսավորման հետ,
- ԼԳԲՏ քրիստոնյաների ֆորումը չունի քաղաքական ենթատեքստ․այն չի հետապնդում որևէ իրավական ակտի ընդունման կամ գործող իրավական ակտերի փոփոխման նպատակ,
- ԼԳԲՏ քրիստոնյաների ֆորումը անցկացվելու է կոնֆերանսի ձևաչափով․ չեն իրականացվելու քայլերթեր, մասսայական հանրային միջոցառումներ կամ շրջայցեր Երևանում և ՀՀ մարզերում,
- ԼԳԲՏ քրիստոնյաների ֆորումը չի ենթադրում և չի նախատեսում Աստվածաշնչի խմբագրում,
- «Նոր Սերունդ» Մարդասիրական ՀԿ-ն չի հանդիսանում ԼԳԲՏ քրիստոնյաների ֆորումի կազմակերպիչ․այն միայն տեխնիկական աջակցություն է ցուցաբերում՝ ֆորումի անցկացման համար։
- «Նոր Սերունդ» Մարդասիրական ՀԿ-ն ողջունում է ցանկացած քաղաքացիական ակտիվություն, եթե այն իրականացվում է օրենքի շրջանակներում և չի ոտնահարում այլոց իրավունքները։
ԿՈՉ ԵՆՔ ԱՆՈՒՄ
ՀՀ Կառավարությանը․
- Հանդես գալ պաշտոնական հայտարարությամբ կամ պարզաբանմամբ՝ ԼԳԲՏ քրիստոնյաների ֆորումին ՀՀ Կառավարության առնչության բացակայության մասին,
- Ներկայացնել դիրքորոշում ՀՀ-ում ԼԳԲՏ անձանց հիմնախնդիրների և նրանց նկատմամբ դրսևորվող խտրականության կանխարգելման ուղղությամբ տարվող աշխատանքների վերաբերյալ։
ՀՀ Ոստիկանությանը․
- Մինչ Ֆորումի անցկացումը և Ֆորումի ընթացքում վերահսկողություն իրականացնել սոցիալական ցանցերում հնչող ատելության կոչերի և սպառնալիքների նկատմամբ, որոնք իրենց մեջ պարունակում են հանցագործության տարրեր,
- Ուսումնասիրել և պատասխանատվության ենթարկել այն անձանց, ովքեր իրենց գործողություններով և կոչերով հրահրում են բռնություն և դրդում ատելության հիմքով հանցագործությունների,
- Ձեռնարկել կանխարգելիչ միջոցառումներ՝ մինչև Ֆորումը և Ֆորումի ընթացքում հնարավոր բախումները կանխելու ուղղությամբ,
ԶԼՄ-ներին․
- Զերծ մնալ մարդու պատիվն, արժանապատվությունն ու բարի համբավը ոտնահարող, վիրավորանք և զրպարտություն պարունակող նյութերի կազմումից ու տարածումից,
- Զերծ մնալ ոչ հավաստի կամ կեղծ, անհայտ և կասկածելի աղբյուրներից ստացված տեղեկատվության տարածումից։
Ընդդեմ ԼԳԲՏ Ֆորումի ակցիայի մասնակիցներին
- Իրացնել հավաքների ազատության իրավունքը՝ ՀՀ և միջազգային իրավական ակտերին համապատասխան,
- Սեփական ելույթներում և քարոզարշավներում զերծ մնալ մարդու պատիվն, արժանապատվությունն ու բարի համբավը ոտնահարող, վիրավորանք և զրպարտություն տարածող, բռնություն և ատելության հիմքով հանցագործություններ հրահրող արտահայտություններից և գործողություններից։
ՀՀ հասարակությանը
- Չտրվել վերջին շրջանում լայն տարածում գտած քաղաքական շահարկումներին և սադրանքներին, որոնք հիմնականում միտված են հասարակության պառակտմանը։
«Նոր Սերունդ» Մարդասիրական ՀԿ
Քիչ է մնում պահանջեք, որ արտակարգ դրություն մտցվի։ Եթե այդքան վստահ չեք, որ լավ եք ընդունվելու, ֆորումի կազմակերպման իմաստը անհասկանալի է մնում։ Ատելության կոչ ասվածի իմաստն էլ լղոզված է, ասենք, եթե մեկը հայտարարեց, որ ավելի լավ է ինքը քսան տարանտուլ կուլ տա, քան թե տեսնի ֆորումի մասնակիցներից որևէ մեկին, դա կլինի ատելության կո՞չ։