«168 Ժամի» հետ զրույցում ՌԴ առաջին կարգի պետական խորհրդական, ռուսական «Ռեգնում» լրատվական գործակալության գլխավոր խմբագիր Մոդեստ Կոլերովն ասաց, որ ՌԴ նախագահը չպետք է շնորհավորի Փաշինյանին խորհրդարանական ընտրություններում՝ կուսակցական պայքարում հաղթելու կապակցությամբ։ Դա, նրա որակմամբ, ՌԴ նախագահ Վլադիմիր Պուտինի մակարդակը չէ։
Կոլերովի համոզմամբ այդ հարցով պատասխանատու են ՌԴ վարչապետ Դմիտրի Մեդվեդևը և ՌԴ Պետական դումայի նախագահ Վյաչեսլավ Վոլոդինը։ «Նրանք պետք է արձագանքեն։ Եկեք դեռ սպասենք, կարծում եմ մինչև շաբաթավերջ ժամանակ կա սպասելու, եթե այս պաուզան շարունակվի՝ ավելի մանրամասն կխոսենք պատճառների մասին։ Այնուամենայնիվ, տարբեր պատճառներ կարող են լինել այս ուշացման համար, եղել է, չէ՞, որ ՀՀ նախկին նախագահին Միացյալ Նահանգները չեն շնորհավորել կամ շատ ուշ են շնորհավորել, տարբեր պատճառներ են լինում, և ամեն բան հնարավոր է։ Ինչպես ասում են, այդպես էլ է պատահում»,- ասաց Կոլերովը՝ ընդգծելով, որ ոչինչ չի բացառվում։
Դիտարկմանը, թե նախկինում ՌԴ նախագահ Վլադիմիր Պուտինը ՀՀ նախկին նախագահ Սերժ Սարգսյանին շնորհավորել է խորհրդարանական ընտրություններում ՀՀԿ-ի հաղթանակի կապակցությամբ, Մոդեստ Կոլերովն արձագանքեց՝ ասելով, որ այո, ստեղծված իրավիճակի համար կան պատճառներ։
Ռուս փորձագետն ասաց, որ ստեղծված իրավիճակը պետք է, որ կապված լինի ՀՀ երկրորդ նախագահ Ռոբերտ Քոչարյանին կալանավորելու որոշման հետ։ Նրա խոսքով, այլ պատճառ նման դիրքորոշման և ուշացման համար չկա։ Կոլերովն ընդգծեց, որ այս հարցի վերաբերյալ Ռուսաստանի նախագահն իր հստակ դիրքորոշումը հայտնել է ՀՀ իշխանություններին։ «Մնացածն ավելի հստակ կլինի առաջիկա օրերին»,- ասաց նա:
Արաքս ՄԱՐՏԻՐՈՍՅԱՆ
Հոդվածն ամբողջությամբ կարող եք կարդալ «168 ժամ» թերթի այսօրվա համարում
Ինքնիշխան պետություն ենք, սակայն ստրուկի հոգեբանությունը չի հաջողվում հաղթահարել: Կշնորհավորեն, թէ չեն շնորհավորի, դա նրանց պրոբլեմն է: Ինչու՞ եք խառնվել իրար…Նրանց համար սա մեծ հարված էր, որովհետև ռուսաստանում տարիներ շարունակ ընտրություններ որպես այդպիսին տեղի չեն ունեցել…