ՀՀ կենտրոնական ընտրական հանձնաժողովն այսօր քննարկեց «Օրինաց երկիր»(«Հայկական վերածնունդ») կուսակցության նախկին անդամ, ԱԺ նախկին պատգամավոր Հովհաննես Մարգարյանի դիմումը, որով նա ցանկանում է նախաձեռնող խումբ գրանցել՝ ՀՀ Սահմանադրությունը հանրաքվեով փոփոխելու նպատակով: ԿԸՀ-ն բավարարեց այն՝ նախաձեռնությունը գրանցում ստացավ:
Հովհաննես Մարգարյանը, հիշեցնենք, վերջերս դուրս էր եկել ՕԵԿ-ից եւ հիմնել «Արժանապատիվ ուղի» կուսակցությունը: Մարգարյանի դիմումին կից ԿԸՀ է ներկայացվել նաեւ Սահմանադրության փոփոխության նախագիծը:
Նշենք, որ ըստ գործող օրենքի՝ ՀՀ Սահմանադրությունը փոփոխելու իրավունք ունեն պատգամավորների ընդհանուր թվի 1/3-ը, ընտրելու իրավունք ունեցող 200 հազար քաղաքացի կամ ՀՀ Կառավարությունը: ԿԸՀ որոշմամբ՝ քաղաքացիների նախաձեռնող խմբի անդամները եւս գրանցում ստացան, իսկ որպես խմբի լիազոր-ներկայացուցիչ գրանցվեց Հովհաննես Մարգարյանը: ԿԸՀ-ն որոշեց նաեւ Սահմանադրության փոփոխությունների նախագիծը հանրաքվեի դնելու նախաձեռնության իրավունք ունեցող 200 հազար քաղաքացիների ստորագրությունների հավաքման համար որպես ժամկետ սահմանել այս տարվա դեկտեմբերի 28-ից մինչեւ 2019թ.-ի փետրվարի 10-ը:
Իսկ սա նշանակում է՝ որպեսզի Սահմանադրության փոփոխության նախագիծը դրվի հանրաքվեի, Հովհաննես Մարգարյանը 45 օրում պետք է հավաքի 200 հազար քաղաքացու ստորագրություն:
Լուիզա ՍՈՒՔԻԱՍՅԱՆ
իսկ օնլայն հնարավոր չէ? Ճիշտ նախաձեռնություն է